Aprelin 24-də Azərbaycan-Fransız Universitetində (UFAZ) TələbəPlus kartı ilə bağlı infosessiya keçirilib.

“Azərbaycan müəllimi” xəbər verir ki, infosessiyanın keçirilməsində əsas məqsəd tələbələri TələbəPlus kartı və onun təqdim etdiyi imkanlar barədə daha ətraflı məlumatlandırmaq, onların suallarını cavablandırmaq olub. Tədbir zamanı tələbələrə kartın qazandırdığı üstünlüklər, əməkdaşlıq edilən şirkətlərdə mövcud endirimlər barəsində məlumat verilib.

Təhsilin İnkişafı Fondunun Layihələrin idarə olunması şöbəsinin baş mütəxəssisi Aysel Məhərrəmova təqdimatla çıxış edərək TələbəPlus layihəsinin məqsədləri, tələbələr üçün yaradılan imkanlar barəsində məlumat verib. Layihənin gələcək perspektivlərinə də toxunan Aysel Məhərrəmova, yaxın gələcəkdə yeni tərəfdaşlarla əməkdaşlıqların qurulacağı və endirim şəbəkəsinin daha da genişlənəcəyini bildirib. Aysel Məhərrəmova çıxışının sonunda TələbəPlus kartının tələbələrə xüsusi imtiyazlar təqdim etməklə yanaşı, onların gündəlik həyatlarını daha rahat və rəqəmsal bir müstəviyə keçirəcəyini,  gündəlik xərclərini daha səmərəli şəkildə izləmək fürsəti yaradılacağını diqqətə çatdırıb.

“Barattson Business & Finance School”un IELTS imtahanları üzrə supervayzeri Cavid İbadzadə tələbələrə “Barratson”un fəaliyyəti, IELTS imtahanlarının növləri və xaricdə təhsil üçün önəmi haqqında ətraflı məlumat verib. “Barattson Business & Finance School”un IELTS sınaq test bölməsinin əməkdaşı Nərmin Abdullayeva imtahandan əvvəl sınaq imtahanlarına qatılmağın əhəmiyyətini xüsusi olaraq vurğulayaraq, TələbəPlus ilə əməkdaşlıq çərçivəsində, tələbələrə müvafiq endirimin təklif olunduğunu qeyd edib.

Çıxış edən “Bakcell”in layihə inkişafı üzrə mütəxəssisi Hacı Qafarov, tələbələrə bir müddət öncə TİF ilə Bakcell arasında TələbəPlus kartı ilə bağlı əməkdaşlıq müqaviləsinin imzalandığını bildirib. Əməkdaşlıq çərçivəsində TələbəPlus kart istifadəçilərinə hər ay 5 GB əlavə internet bonusunun təqdim edildiyini bildirən Hacı Qafarov, bu təşəbbüsün onların təhsil prosesində daha rahat və sərbəst şəkildə onlayn resurslardan istifadə etməsinə imkan yaradacağını vurğulayıb.

Çıxışların sonunda sual-cavab sessiyası təşlkil olunub. Təhsilin İnkişafı Fondunun nümayəndələri Aysel Məhərrəmova və Vəli Babayev tələbələrin suallarını ətraflı cavablandırıblar.

Qeyd edək ki, “TələbəPlus” layihəsi Təhsilin İnkişafı Fondu, Kapital Bank və “Visa” beynəlxalq ödəmə texnologiyaları şirkətinin birgə təşəbbüsü ilə həyata keçirilir. Layihənin məqsədi tələbələrə eyni güzəşt və endirimlər təqdim etməklə yanaşı, onların tələbəlik dövründən maliyyə əlçatanlığını təmin etmək, gündəlik xərclərini daha səmərəli şəkildə izləmək fürsəti, həmçinin onların sosial həyatlarına dəstək göstərmək məqsədi daşıyır.