“Bu günlərdə həmkarlarımız ilə Xankəndi şəhərini addım-addım gəzdik. Məncə, bu tarixi şəhərin çox böyük potensialı var. Xankəndi şəhəri gələcəkdə Azərbaycanın, hətta dünyanın ən böyük, ən gözəl Universitet şəhərlərindən biri olacaq”.

Bu fikirləri “Azərbaycan müəllimi”nə açıqlamasında Qarabağ Universitetində keçirilən beynəlxalq konfransın iştirakçısı, onkoloq-cərrah Vüqar Yaqublu bildirib.

Almaniyanın Heydelberq (Heidelberg) Universitetinin Mannheym (Mannheim) Cərrahiyyə Mərkəzində bölmə müdiri müavini və TƏBİB Direktorunun müşaviri vəzifəsində çalışan cərrah onkoloq V.Yaqublu qeyd edib ki, bu onun Qarabağ bölgəsinə ilk səfəridir: 

“İlk dəfədir ki, Xankəndidəyəm, Şuşanı ziyarət edirəm. Bu regionda böyük hədəfləri olan Qarabağ Universitetinin qurulması və onun mövcud olduğundan da böyük struktura çevriləcəyi inamı bizləri qürurlandırır. Burada geniş məktəblər, heç yerdə rastlaşmadığım qədər gözəl tələbə yataqxanası gördüm. Eyni zamanda, inşası davam etdirilən mədəniyyət mərkəzləri, kinoteatrlar və digər vacib infrastruktur obyektləri də var. Bir sözlə, bu müasir tikililər tarixi şəhəri dünyanın ən gözəl universitet şəhərlərindən birinə çevirəcək”.

Onkoloq-cərrah diqqətə çatdırıb ki, konfrans gözləntilərin üstündə təşkil edilib: “Tibb sahəsində fərqli mövzular üzrə çıxış edən bir-birindən dəyərli qonaqlarla birgə faydalı müzakirələr apardıq. Konfransın əsas hədəflərindən biri də dünya tibb təhsilində ən qabaqcıl texnologiyaları ortaya qoyaraq müasir tibb təhsili konsepsiyası ərsəyə gətirmək idi. Konfransın panel müzakirələrində də gələcəkyönümlü təkliflər irəli sürdük. Hesab edirəm ki, konfransın məqsədinə çatmağa nail olduq”.

Vüqar Yaqublu 20 ildir Almaniyada tibb sahəsində fəaliyyət göstərdiyini vurğulayaraq əlavə edib ki, bu müddət ərzində mütəmadi olaraq Azərbaycan səhiyyəsində baş verən proseslərlə və tibb təhsili ilə maraqlanıb: “Bu istiqamətdə çoxsaylı layihələr həyata keçirmişik və fərqli strukturlarla əməkdaşlıqlarımız var. Azərbaycan səhiyyəsinin inkişafında son dövrlər baş verən proseslər tibb təhsilinin təkmilləşdirilməsinə yeni tələblər qoyur. Artıq bir müddətdir, Azərbaycanda icbari tibbi sığorta tətbiq olunur. Bu, hər bir xəstə üçün əlçatan proses olmaqla yanaşı, həm də ixtisaslı mütəxəssislərə ehtiyacı artıran faktordur. Məhz TƏBİB çərçivəsində başlanılan region klinikalarında zəruri cərrahi və anestezioloji xidmətin inkişafı proqramının gedişində bu ehtiyac aşıq-aşkar görünür. Bu nöqteyi-nəzərdən tibb təhsilinə yenilikləri gətirə biləcək yeni yanaşmalara zərurət var. 

Qarabağ Universitetinin yaradılması həm də yeniliklərin gətirilməsi cəhətdən olduqca vacib məsələdir. Xüsusilə qısa müddətdə tibb fakültəsinin yaradılması xaricdə yaşayan həmvətənlərimizi çox sevindirir. Çünki bu fakültənin yaradılması ilə yeniliklərin tətbiqi, xaricdən mütəxəssislərin cəlb olunması tibb təhsili sahəsində, həmçinin müasir bilik və təcrübənin gündəlik tibbi fəaliyyətlərdə tətbiqi üçün əhəmiyyətli olacaq”, - deyə alim fikirlərini yekunlaşdırıb.

Günel ABBAS