ARTİ riyaziyyat fənni üzrə tapşırıqların panel müzakirəsini keçirib
Təhsil İnstitutunun təşkilatçılığı ilə IV və VI siniflərdə təhsil alan şagirdlərin monitorinq qiymətləndirməsinin sınaq mərhələsində istifadə olunan riyaziyyat fənni üzrə tapşırıqların panel müzakirəsi keçirilib.
Bu barədə institutdan “Azərbaycan müəllimi”nə məlumat verilib. Bildirilib ki, panel müzakirədə ölkənin ayrı-ayrı təhsil müəssisələrindən riyaziyyat fənnini tədris edən müəllimlər iştirak edib. Panel müzakirənin keçirilməsində məqsəd dövlət ümumi təhsil müəssisələrinin IV və VI siniflərində təhsil alan şagirdlərin monitorinq qiymətləndirməsinin sınaq mərhələsində istifadə olunan riyaziyyat fənn tapşırıqlarının təkmilləşdirilməsi istiqamətində ekspertlərlə fikir mübadiləsi aparmaq olub.
Müzakirə zamanı sınaq qiymətləndirmənin nəticələrinin statistik təhlili əsasında şagirdlərin hər bir tapşırıq üzrə performansı təqdim olunub. Eskpertlər stimul, sualın kökü, çətinlik və diskriminasiya dərəcəsi, məzmun xətti, ölçülən səriştələr, distraktorlar və s kimi meyarlar daxil olmaqla tapşırıqları qiymətləndirib, onların təkmilləşdirilməsi istiqamətində təkliflər verib və effektiv müzakirələr aparıblar.
Görüşün sonunda növbəti tədris ilində monitorinqdə istifadə olunacaq riyaziyyat fənni üzrə səriştə əsaslı tapşırıqların hazırlanması ilə bağlı fikirlər səsləndirilib və təkliflər irəli sürülüb.
