SABAH qruplarının 10 illik yubileyinə həsr olunan tələbə-məzun forumu və karyera sərgisi baş tutub. Tədbirin məqsədi SABAH qruplarının əldə etdiyi nailiyyətləri nümayiş etdirmək, məzunların məşğulluq göstəricilərini təhlil etmək, məzun assosiasiyasının təməlini qoymaq və tələbə-məzunlar arasında şəbəkələşməni təşviq etməkdir.

“Azərbaycan müəllimi” xəbər verir ki, foruma Elm və Təhsil Nazirliyinin rəsmiləri, universitet nümayəndələri və digər səlahiyyətli şəxslər qatılıb.

Nazir müavini İdris İsayev çıxışında təhsil ilə əmək bazarı arasında daha interaktiv əlaqələrin qurulmasının vacibliyini vurğulayıb:

“Gənclər gələcəyin tələblərinə uyğun məqsədlər müəyyən etməlidir”.

Milli Observatoriyanın direktoru Elnur Səfərli SABAH qruplarının məşğulluq göstəricilərinin ölkə üzrə 86% olduğunu qeyd edərək, məzunların orta əməkhaqqının 1250 manatdan yüksək olduğunu bildirib.

UNEC-in rektoru Ədalət Muradov SABAH qruplarının ali təhsil sistemində innovativ model kimi rolunu vurğulayıb:

“UNEC-də SABAH məzunlarının 100%-i işlə təmin olunur”.

Qeyd edək ki, forum iki gün davam edəcək. “SABAH layihəsinin ali təhsil sisteminə töhfəsi”, “Universitet-sənaye əməkdaşlığı”, “Liderlikdə vizyon və strategiya” mövzularında müzakirələr aparılacaq.

Tədbirdə tələbə və məzunların əl işlərindən ibarət “Virtual muzey”in təqdimatı, karyera sərgisi keçirilib. TEDx formatında çıxışlar və intellektual yarışlar təşkil olunacaq.