“Hazırda Elm və Təhsil Nazirliyinin həyata keçirdiyi ən böyük islahatlardan biri 5 yaşlı uşaqların məktəbəhazırlıq siniflərinə cəlb edilməsi layihəsinin tətbiqidir”.

“Azərbaycan müəllimi” xəbər verir ki, bunu elm və təhsil naziri Emin Əmrullayev bu gün keçirilən “Məktəbəqədər təhsildə keyfiyyətə yeni baxış” adlı II beynəlxalq konfransda çıxışı zamanı deyib. 

O bildirib ki, bu islahat ilk dəfə 2014-2015-ci tədris illərində pilot səviyyədə həyata keçirilməyə başlanılıb, 2016-cı ildən isə daha geniş miqyasda Azərbaycanın bir çox regionlarında tətbiq edilib:

“Nəticədə 30%-lik göstəricini 80-90%-ə yaxınlaşdırmağa nail olmuşuq. Bu rəqəmlər müxtəlif illərdə dəyişsə də, orta hesabla hər il uşaqların 80-90%-i ən azı, bir il məktəbəqədər təhsilə cəlb olunur”. 

Nazir bu islahatı hansı səbəbə görə böyük  nailiyyət hesab etdiyini də açıqlayıb: 

“Həmin bir illik hazırlığın 100 minlərlə uşağın gələcək sosial-iqtisadi həyatına və təhsil göstəricilərinə müsbət təsir göstərəcəyi şübhəsizdir. Bəzi suallar yarana bilər: Niyə biz bu müsbət təsirləri dərhal görmürük? Bunun səbəbi "həyat dövrü" adlandırılan bir məsələ ilə bağlıdır. Məsələn, 2017-ci ildə 5 yaşında olan uşaq hazırda 13-14 yaşındadır və hələ 9-cu sinif buraxılış imtahanını verməyib. Təhsildə görülən işlərin nəticələrinin uzunmüddətli olmasının səbəbi də məhz budur”.

Emin Əmrullayev əlavə edib ki, məktəbəqədər yaşda həyata keçirilən və ya keçirilməyən tədbirlərin təsirlərini yalnız 10-15 il sonra görmək mümkündür.