ABŞ-ın aparıcı universitetlərindən birində – Corciya Texnologiya İnstitutunda təhsil alan azərbaycanlı tələbə Məmmədli İlkin Pərviz oğlu virtual reallıq və yeni texnologiyalar sahəsində ən böyük tələbə hakatonlarından birinin – “ImmerseGT 2025”in direktoru olub.

Tədbir bütün texnologiya ictimaiyyətinin diqqətini cəlb edib, üç gün ərzində Georgia Tech kampusunda keçirilən ImmerseGT 2025 hakatonu 50 universitet və 10-dan çox ölkədən 350-dən çox iştirakçını bir araya gətirib. Tədbir zəngin proqramı ilə yadda qalıb: ustad dərsləri, texnologiya sərgiləri, mentorluq sessiyaları və innovativ layihələrin təqdimatları. Bu il ImmerseGT dünyanın ən böyük immersiv texnologiya hakatonlarından birinə çevrilib.

“Azərbaycan müəllimi” xəbər verir ki, 1news.az-a açıqlamasında İ.Məmmədli qeyd edib: “Universitetlərdə və ondan kənarda immersiv texnologiyaların necə yayıldığını görmək məni inanılmaz dərəcədə ruhlandırır. Belə bir qlobal təşəbbüsə rəhbərlik etmək bir azərbaycanlı olaraq mənim üçün böyük şərəfdir. Bu, gənclərimizin innovasiya sahəsində ən yüksək səviyyədə liderlik etməyə qadir olduğunu nümayiş etdirir”.

Azərbaycanlı tələbənin rəhbərliyi ilə “ImmerseGT” 50.000 ABŞ dollarından çox maliyyə vəsaiti, mükafatlar və avadanlıq cəlb edib. Tədbirin sponsorları arasında texnologiya nəhəngləri Snap Inc., Niantic, MeshyAI və Georgia Tech inkubator CREATE-X, həmçinin Major League Hacking, Reboot Imagine, GroKit, CELSIUS, AWE və VR/AR@MIT kimi beynəlxalq tərəfdaşlar var. Bəzi şirkətlər bu hakatonda ilk dəfə olaraq ən son texnologiyalarını təqdim ediblər.

“Hakaton sırf innovasiya üçün unikal mühit yaradır – burada üç gün ərzində müxtəlif mənşəli insanlar dünyanı dəyişə biləcək texnologiyalar yaratmaq üçün bir araya gəlirlər”, - deyə İ.Məmmədli vurğulayır.

Bundan əlavə, İlkin Məmmədli “Georgia Tech VR” tələbə təşkilatının prezidentidir və universitetdə sahibkarlığın və innovasiyaların inkişafında mühüm rol oynayır. Onun rəhbərliyi sayəsində “ImmerseGT" virtual reallıq və süni intellekt məkanında beynəlxalq səviyyədə tanınan platformaya çevrilib və tədbirdə təqdim olunan bir neçə layihə artıq maliyyə vəsaiti alıb.

İ.Məmmədlinin uğuru ölkənin qlobal innovasiya ekosistemində artan rolunun göstəricisidir. VR və süni intellekt texnologiyaları səhiyyə və təhsil kimi sektorları dəyişdirdikcə, Azərbaycan gəncləri gələcəyin liderləri olmağa hazır olduqlarını nümayiş etdirirlər.