Oktyabrın 17-də Azərbaycan Dövlət Neft və Sənaye Universitetində (ADNSU) SEDIP – “Sustainable Economic Development, Science and Innovation Platform” tərəfindən “Elm və Davamlılıq Konfransı 2025” (“Science and Sustainability Conference 2025”) keçirilib.

Universitetdən “Azərbaycan müəllimi”nə bildirilib ki, Ümummilli Lider Heydər Əliyevin anadan olmasının 102-ci ildönümünə həsr olunmuş konfransın məqsədi elmi tədqiqatların, innovasiyanın və iqtisadi inkişafın dayanıqlı gələcək naminə qarşılıqlı əlaqəsini gücləndirmək, elmi siyasətin yeni istiqamətlərini müzakirə etmək və elm-sənaye əməkdaşlığını təşviq etmək olub.

Konfransda Elm və Təhsil Nazirliyi, ADNSU, Təhsildə Keyfiyyət Təminatı Agentliyi, Kiçik və Orta Biznesin İnkişafı Agentliyi, Dövlət Ehtiyatları Agentliyinin nümayəndələri və “Masdar” şirkətinin Azərbaycan nümayəndəliyinin təmsilçiləri iştirak ediblər. Konfrans “Novation” şirkətinin dəstəyi ilə təşkil edilib. Tədbirin tərəfdaşları Azərbaycan Dövlət Neft və Sənaye Universiteti və İnnovasiya və Rəqəmsal İnkişaf Agentliyi olub.

“Sonsuz tərəqqi” devizi ilə keçirilən tədbirdə dövlət qurumlarının, akademik dairələrin və biznes nümayəndələrinin iştirakı ilə iki əsas panel müzakirəsi təşkil olunub. Birinci panel “Elm, iqtisadiyyat və dayanıqlı inkişaf”, ikinci panel isə “Texnologiya, startaplar və elmin gələcəyi” mövzusuna həsr edilib.

Müzakirələr zamanı elm siyasətinin təkmilləşdirilməsi, innovasiya yönümlü iqtisadi model, startap ekosisteminin inkişafı və dayanıqlı texnoloji gələcək istiqamətləri diqqət mərkəzində olub.

Tədbir çərçivəsində, həmçinin “ScienceHub” platformasının təqdimatı baş tutub. “ScienceHub” – Azərbaycan elmi ekosistemini gücləndirməyi, tədqiqatçıları və gənc alimləri bir araya gətirərək onların beynəlxalq elmi əməkdaşlıqlarda daha fəal iştirakını təmin etməyi hədəfləyən rəqəmsal təşəbbüsdür.

Konfrans ölkədə elm, təhsil, innovasiya və iqtisadiyyatın dayanıqlı inkişafı istiqamətində əməkdaşlıq üçün mühüm platforma rolunu oynayıb və gənc tədqiqatçılar üçün yeni imkanların formalaşmasına təkan verib.