Azərbaycan Dövlət Pedaqoji Universitetində (ADPU) Azərbaycan Təhsil İşçiləri Azad Həmkarlar İttifaqı, ADPU Həmkarlar İttifaqı Komitəsi, ADPU Tələbə Həmkarlar İttifaqı Komitəsinin dəstəyi və “T-Network” platformasının tərəfdaşlığı ilə “Məktəbəqədər Təhsil üzrə İnkişaf Mərkəzi” layihəsinə start verilib.

Universitetdən “Azərbaycan müəllimi”nə bildirilib ki, layihə çərçivəsində ADPU-da Məktəbəqədər Təhsil üzrə İnkişaf Mərkəzi yaradılıb.

Layihənin əsas məqsədi beynəlxalq məktəbəqədər təhsil təcrübəsinə əsaslanaraq, ADPU-da müvafiq sahə üzrə təmsil olunan müəllim və tələbələrin, o cümlədən bu sahədə çalışan şəxslərin bilik və bacarıqlarını artırmaq, onların pedaqoji səriştələrinin inkişafına dəstək olmaqdır.

Bu məqsədlə layihə iştirakçıları üçün “Məktəbəqədər təhsildə uşaqyönlü mühitin təşkili” adlı kurs proqramına başlanılıb. İştirakçılar uşaqların inkişafında təlim mühitinin dizaynı, oyunəsaslı və layihəəsaslı öyrənmə mövzularında təlimlərə qatılaraq, məktəbəqədər təhsildə müasir yanaşmalar, uşaqyönlü təhsil mühitinin təşkili və dəyərləndirmə meyarları ilə tanış olur, öz bilik və bacarıqlarını inkişaf etdirir, müxtəlif qrup tapşırıqları vasitəsilə dünya təcrübəsi ilə tanış olmaq imkanı əldə edirlər. 

Təlim məktəbəqədər təhsil üzrə beynəlxalq mütəxəssis Sənəm Əliyeva tərəfindən keçirilir. Layihə çərçivəsində “Məktəbəqədər təhsildə uşaqyönlü mühitin təşkili” adlı vəsait də hazırlanaraq təqdim ediləcək. Bununla yanaşı, bu vəsait əsasında 4 videoməzmun hazırlanacaq və əlçatanlığı təmin etmək məqsədilə bu məzmunlar onlayn formatda paylaşılacaq.