Azərbaycan Memarlıq və İnşaat Universitetin (AzMİU) Tələbə Elmi Cəmiyyətinin (TEC) nəzdində fəaliyyət göstərəcək Su təsərrüfatı və mühəndis kommunikasiya sistemləri fakültəsinin “Dayanıqlı Mühəndislik” klubunun açılışı baş tutub. Klubun yaradılması universitetin 50 illik yubileyinə həsr olunub.

Universitetdən “Azərbaycan müəllimi”nə bildirilib ki, tədbirdə TEC-in sədri Günel İmamquliyeva klubun əhəmiyyəti və tələbələrə verəcəyi faydalar barədə məlumat verib. Daha sonra fakültənin dekan əvəzi Elgiz Həsənov, Mühəndis sistemləri və qurğuların tikintisi kafedrasının müdiri professor Nurməmməd Məmmədov, fakültə TEC-in sədri Hamlet Əliyev, fakültənin akademik heyəti klubun yaradılmasını yüksək qiymətləndirərək, onun fəaliyyətinə uğurlar arzulayıblar.

Bildirək ki, klubun əsas məqsədi bərpa olunan və alternativ enerji mənbələri, eləcə də dayanıqlı mühəndislik sahəsində tələbələrin bilik və bacarıqlarını artırmaq, elmi tədqiqatlara marağı təşviq etməkdir. Bu istiqamətdə seminarlar, təlimlər, texniki ekskursiyalar və müxtəlif layihələrin həyata keçirilməsi planlaşdırılır.

Tədbirin davamında klubun sədri Məleykə Əliyeva və digər komanda üzvləri “Dayanıqlı Mühəndislik” adlı təqdimatla çıxış ediblər. Təqdimat zamanı alternativ enerji mənbələrinin mühəndislik sahəsində rolu, klubun strateji hədəfləri, planlaşdırılan seminarlar, texniki ekskursiyalar və layihələr barədə ətraflı məlumat verilib. Həmçinin klub üzvləri auditoriyaya təqdim olunub,  onların gələcək fəaliyyət istiqamətləri haqqında  məlumat verilib.

Universitet rəhbərliyi və akademik heyətin dəstəyi ilə fəaliyyət göstərəcək “Dayanıqlı Mühəndislik” Klubu tələbələrin nəzəri biliklərini təcrübə ilə birləşdirməsində, elmi tədqiqatlara maraqlarının artmasında və mühəndislik sahəsində innovativ yanaşmaların inkişafında mühüm rol oynayacaq.