Azərbaycan Memarlıq və İnşaat Universitetində (AzMİU) Tələbə Həmkarlar İttifaqı Komitəsinin (THİK) təşkilatçılığı ilə gənclər arasında sağlam həyat tərzinin təbliği məqsədilə “Narkotik vasitələrin zərərləri və onlardan qorunma yolları” mövzusunda maarifləndirici görüş keçirilib.

“Azərbaycan müəllimi” xəbər verir ki, THİK-in sədri Şahmar Rəfili, müəllim və tələbə heyətinin iştirak etdiyi görüş zamanı narkotik vasitələrin insan orqanizminə, psixoloji vəziyyətə və sosial həyata göstərdiyi mənfi təsirlər barədə geniş məlumat verilib.

Çıxış edən qonaqlar narkotik asılılığının yalnız fərdi deyil, həm də ailə və cəmiyyətə ciddi təhlükə yaratdığını söyləyiblər. Onlar gənclərin bu istiqamətdə maarifləndirilməsinin və sağlam düşüncəyə sahib olmalarının cəmiyyətin gələcəyi baxımından mühüm əhəmiyyət daşıdığını deyiblər.

Tədbir çərçivəsində narkomaniyanın acı nəticələrini əks etdirən qısametrajlı film nümayiş olunub. Real hadisələr əsasında hazırlanan filmdə narkotik vasitələrdən istifadənin insan həyatına gətirdiyi faciəvi nəticələr tələbələr tərəfindən böyük maraqla izlənib.

Vurğulanıb ki, bu cür maarifləndirici tədbirlər gənclərin narkotik vasitələrdən uzaq durması və sağlam həyat tərzinin təşviqi baxımından xüsusi əhəmiyyət kəsb edir.