““ELSA Roadmap”da ingilis dili səriştələri ilə bağlı milli hədəflər öz əksini tapıb”.

“Azərbaycan müəllimi” xəbər verir ki, bu fikirləri Elm və Təhsil Nazirliyi ilə Britaniya Şurası arasında imzalanmış birgə fəaliyyət planı çərçivəsində Təhsil İnstitutu ilə əməkdaşlıqda hazırlanmış “ELSA Roadmap” (English Language Strategy for Azerbaijan Roadmap – Azərbaycan üçün ingilis dili strategiyası yol xəritəsi) sənədinin təqdimat mərasimində sənədin hazırlanmasında iştirak etmiş beynəlxalq ekspert Simon Borg səsləndirib.

O bildirib ki, artıq yeni kurikulumda dil tədrisi ilə bağlı vacib olan dörd bacarıq: oxu, yazı, dinləmə və danışma inteqrasiya olunmuş şəkildə tədris üçün təqdim edilib.

“Mən deyərdim ki, bu yeni kurikulum əladır. Lakin burada nəzərə almaq lazımdır ki, dərs saatları nə qədərdir, müəllim hazırlığı hansı səviyyədədir və qiymətləndirmə alətləri tam şəkildə varmı?”, – deyə Simon Borg əlavə edib.

Onun sözlərinə görə, ingilis dili ilə bağlı yol xəritəsinin uğurlu tətbiqi üçün bu amillər olduqca vacibdir. Ekspert vurğulayıb ki, müəllim səriştələrinə təsir edən beş əsas amil müəyyən edilib:

– Pedaqoji təhsil;
– İlkin dəstək: yeni başlayan müəllimlərə ən azı ilk iki il ərzində dəstək göstərilməsi vacibdir;
– Özünüinkişaf imkanları yaratmaq;
– Müəllimlərin qiymətləndirilməsi;
– Yeni sertifikatlaşdırma mexanizmləri.

O bildirib ki, hazırda Azərbaycanda tətbiq olunan yeniliklər beynəlxalq təcrübələrə uyğun şəkildə həyata keçirilir. Bu dəyişikliklərə yeni kurikulumun və dərsliklərin hazırlanması da daxildir. 

“Yeni dərsliklər sadəcə tərcümə deyil, eyni zamanda, Azərbaycan kurikulumuna uyğunlaşdırılmış şəkildə hazırlanır. Bu da təhsil sistemində müsbət dinamikanın göstəricisidir”, – o vurğulayıb.

Bununla belə, xarici ekspert çatışmayan cəhətlərin də olduğunu diqqətə çatdırıb: “Əsas problemlərdən biri xarici dil üzrə sertifikatlaşdırmada danışıq meyarının kifayət qədər nəzərə alınmamasıdır ki, bu da dil tədrisinə mənfi təsir göstərir. Azərbaycanda ingilis dili tədrisindəki əsas problemlərdən biri də müəllimlərin məhdud kompetensiyaları və dörd bacarığa əsaslanan qiymətləndirmələrin olmamasıdır”. 

O həmçinin təklif edib ki, "İngilis dili müəllimliyi" ixtisası üzrə qəbul aparılarkən abituriyentin 11 illik xarici dil üzrə ümumi orta müvəffəqiyyət göstəricisi də nəzərə alınsın: “Hazırlanan bu yeni sənəddə bu da təklif edilib”.