O, təkcə tablolar, kətanlar üzərində deyil, həm də divar üzərində maraqlı rəsmlər çəkir. Uşaqlıqdan rəsmə böyük həvəsi olan Nuray bu peşəni müəllim yanına getmədən, özü sərbəst şəkildə öyrənməyə çalışıb. Lakin daha sonra bu sahə üzrə bacarıqlarını təkmilləşdirməyə qərar verib.

Paytaxtdakı 322 nömrəli tam orta məktəbin 11-ci sinif şagirdi Nuray Əliyeva “Azərbaycan müəllimi” ilə söhbətində deyir ki, məktəblərində siniflərarası keçirilən rəsm yarışmasında birinci yeri tutduqdan sonra öz istedad və bacarığını yoxlamaq üçün 3 rəsm əsəri ilə Binə Mədəniyyət  Mərkəzində təşkil olunan rəsm müsabiqəsinə qatılıb: “Bu müsabiqə, əsasən, sərbəst texnikaya aid idi. İstədiyimiz rəsmi çəkə bilərdik. “Musiqi bizim ruhumuzdur”, “Qadınların görünməyən ruhu”, “Anılmaz duyğular”  adlı rəsmlərim münsiflər heyəti tərəfindən  bəyənildi  və 103 nəfərdən  6 nəfər növbəti tura vəsiqə aldı”.

Nuray danışır ki, növbəti tura 12  rəsmi ilə qatılıb. “Rəng ahəngi”,  “Musiqi həyatım”,  “İnanclı həyat”, “Bədahətən çalar”, “Boyalı gəncliyim”,  “Xəyallarımın ümüdü”,  “Axış”,  “İldırımlı çalar”, “Naxışlı xalça”,  “Müharibənin bitməyən fəryadı”, “Çağırış” və  “Həyatın Mübarizəsi” əsərləri, xüsusilə 44 günlük Vətən müharibəsinə həsr etdiyi “Dəmir yumruq”  əsəri  seyrçilər tərəfindən bəyənilib: "Milli və müasir üslubda işlədiyim kompozisiyalar, təbiət  tabloları həmişə tamaşaçılarda xoş ovqat yaradıb. Əlbəttə, rəsm müəllimim Vüqar Muradovun əməyi sayəsində bu uğurlara nail olmuşam.  Sərgiyə çıxardığım rəsmlərimdən bəzilərini satmışam, bəzilərini isə hədiyyə etmişəm. Amma daha çox sifarişlər qəbul edirəm, çünki tablolar, kətanlar üzərində işləməyimə baxmayaraq, divar üzərində də rəsmlər çəkməyi bacarıram”.

Məktəblinin sözlərinə görə, Muğam Mərkəzində, Bakı Xətai Sənət Mərkəzində keçirdiyi sərgilərində 20 -ə yaxın əsəri nümayiş olunub və tamaşaçılar tərəfindən bəyənilib.

Gənc istedad eyni zamanda “Zirvə” Uşaq Akademiyasının onlayn rəsm klubunun sədri seçilib. O, kiçik yaşlı həvəskar rəssamlara boyalar, rənglərlə bağlı təlimlər, müsabiqələr keçirir, onları bu  peşəni sevdirməyə çalışır. Arzusu Azərbaycan Dövlət Rəssamlıq Akademiyasının tələbəsi olmaqdır".