30 yanvar tarixindən etibarən Respublika Fənn Olimpiadalarında iştirak üçün qeydiyyatdan keçən şagirdlər https://portal.edu.az/ platforması üzərindən “Müsabiqə və olimpiadalar” bölməsinə daxil olaraq buraxılış vərəqələrini yükləyə və çap edə bilərlər.

“Azərbaycan müəllimi” xəbər verir ki, bu barədə Təhsil İnstitutu məlumat yayıb.

Qeyd edək ki, Respublika Fənn Olimpiadalarının yarımfinal turu informatika fənni üzrə 8-9-cu siniflər üçün fevralın 15-də, 10-11-ci siniflər üçün fevralın 16-da, digər fənlər üzrə isə fevralın 23-də keçiriləcək.

Şagirdlər buraxılış vərəqələrinin şəxsi kabinet vasitəsilə əldə edilməsi ilə bağlı yaranan hər hansı çətinliklə əlaqədar təhsil aldıqları ümumtəhsil müəssisələrinə müraciət edə bilərlər.

Nəzərinizə çatdıraq ki, Respublika Fənn Olimpiadalarının keçirilməsində əsas məqsəd şagirdlərdə keyfiyyətli təhsilalma, biliklərə marağı artırmaq və özünə inam hisslərini gücləndirmək, ayrı-ayrı fənlər üzrə istedadı və yaradıcı təfəkkürü ilə fərqlənənləri aşkar etməklə onların potensial imkanlarının inkişafını təşkil etmək istiqamətində tədbirlər müəyyənləşdirmək, şagirdlərin ixtisas və peşə seçiminə hazırlanması üçün zəmin yaratmaqdan ibarətdir.

Respublika Fənn Olimpiadaları “Birbank”ın baş sponsorluğu ilə təşkil edilir.