Qusarlı gənc qız regionda ilkə imza atmağa müvəffəq olub. Belə ki, Quba-Xaçmaz Regional Təhsil İdarəsi Qusar rayonu təhsil sektoru nəzdində fəaliyyət göstərən Sərvər Abdulkərimov adına Balaqusar kənd tam orta məktəbinin evdə fərdi təhsilə cəlb olunmuş məzunu Ağababayeva Nuranə Ağababa qızı 313.3 balla Bakı Mühəndislik Universitetinin “Biznesin idarə edilməsi” ixtisasına qəbul edilib.

Tələbə adını qazanan Nuranə Ağababayeva sevincini “Azərbaycan müəllimi” ilə bölüşüb.

2007-ci ildə Qusar rayonunun Bədirqala kəndində anadan olan Nuranə Ağababayeva 2014-cü ildə Balaqusar kənd tam orta məktəbinin birinci sinfinə qəbul edilsə də, səhhəti ilə əlaqədar məktəbə gedə bilmədiyi üçün evdə fərdi təhsilə cəlb olunub. Nuranənin sözlərinə görə, evdə fərdi təhsil aldığı illər ərzində Qusar rayonu üzrə təhsil sektorunun əməkdaşları, təhsil aldığı məktəbin rəhbərliyi və müəllimləri daim onu diqqətdə saxlayıb, tez-tez ona baş çəkib və köməyini əsirgəməyiblər: “Rayonumuzun təhsil sektorunun müdiri Naira Kliçova, sektorun əməkdaşı Nəzirə Babayeva həmişə mənim təhsilimlə maraqlanıb, mənə lazımi kömək göstəriblər. Həmçinin mənə dəstək olan məktəbimizin direktoru Babacan Zəkiyevə, coğrafiya müəllimim Sahib Ağaverdiyevə, riyaziyyat müəllimim Yeganə Hacıyevaya, eləcə də digər müəllimlərimə təşəkkürümü bildirirəm. Müəllimlərimin köməyi və öz üzərimdə daim çalışaraq tələbə adını qazanmağa nail olmuşam”. 
 
Nuranə bildirir ki, universitetdə əyani təhsil almağı düşünür. O, ali məktəbin ərazisində yerləşən tələbə yataqxanasında qalmağı planlaşdırır. Tələbə olmaq sevincinin təəssüratlarını bölüşən qənc qız sevincinin hədd-hüdudu olmadığını qeyd edir: “Universitetə qəbul olacağıma çox inanırdım. Çünki qarşıma məqsəd qoyaraq əzmlə öz üzərimdə çalışırdım. Ailəm həmişə mənim yanımda olaraq təhsilimlə maraqlanıb, mənə ruh yüksəkliyi verib, dəstək göstəriblər”. 

Bacarıqlı gəncin oxumaqdan başqa bir çox sevdiyi məşğuliyyətləri də var. O, pianinoda gözəl ifa edir, rəsmlər çəkir, müxtəlif əl işləri ilə məşğul olur. Nuranənin hədəfi univeristetin bakalavriat səviyyəsini yüksək nəticələrlə bitirmək, daha sonra təhsilini davam etdirməkdir. 
Nuranə Ağababayevanın timsalında bir daha şahid oluruq ki, məqsəd və əzmkarlıq bütün çətinliklərin öhdəsindən gəlməyə bəs edir.
 

Gələcək arzularına çatmaq üçün Nuranəyə möhkəm cansağlığı və bol uğurlar diləyirik!