Gəncə Dövlət Universiteti (GDU) Times Higher Education tərəfindən təşkil olunan Asiya Ali Təhsil Mükafatları (THE Awards Asia) 2025 müsabiqəsində Ətraf Mühit kateqoriyasında qısa siyahıya daxil edilib.  

Universitetdən "Azərbaycan müəllimi"nə məlumata görə, bu müsabiqə hər il keçirilir və 2025-ci il üçün 10 müxtəlif kateqoriya üzrə 500-dən çox universitet müraciət edib. Hər kateqoriyada 8 universitet qısa siyahıya düşüb.  

GDU müsabiqədə “Ətraf Mühitə Verilən Müstəsna Töhfə” kateqoriyasında iştirak edib.

Müsabiqənin qalibləri 22 aprel 2025-ci ildə Makao Elm və Texnologiya Universitetində təşkil olunacaq THE Asiya Universitetləri Sammitinin ilk günündə elan ediləcək.  

Gəncə şəhərinin Avropa Yenidənqurma və İnkişaf Bankının (AYİB) Yaşıl Şəhərlər Proqramına qoşulması ilə bağlı olaraq, Gəncə Dövlət Universiteti bu sahədə bir sıra layihələrdə iştirak edib. Universitetin Dayanıqlı Ağıllı Şəhərlər Mərkəzinin dəstəyilə Avropa Yenidənqurma və İnkişaf Bankı, Qafqaz Regional Ekoloji Mərkəzi və İngiltərənin Atkins Realis təşkilatı Gəncə şəhərinin Yaşıl Şəhər Fəaliyyət Planını hazırlayıb. Plan, şəhərin enerji səmərəliliyini artırmaq, yaşıl əraziləri genişləndirmək, ekoloji problemləri həll etmək və yeni infrastruktur yaratmaq istiqamətində 15 illik fəaliyyətləri əhatə edir.