Elə uşaqlar var ki, çevik zəkası, yorulmaz enerjisi ilə erkən yaşlarından ətrafdakıların diqqətini çəkməyi bacarırlar. İstedadı, çalışqanlığı və öyrənməyə sonsuz həvəsi ilə seçilən bu uşaqlar gələcəyin uğurlu insanlarına çevriləcəyini elə ilk andan hiss etdirirlər. Nilufər də məhz belə balacalarımızdandır. Onun hekayəsi bizə göstərir ki, məqsədli şəkildə, əzmkarlıq və sevgi ilə çalışanlar üçün heç bir uğur təsadüfi deyil.

Nilufər Sərdarova Bakı şəhəri 263 nömrəli tam orta məktəbinin 2-ci sinif şagirdidir. O, artıq kiçik yaşlarından fərqli dilləri öyrənməyə maraq göstərir, bu maraq isə onun dünyaya baxışını daha da genişləndirir. Lakin Nilufərin təkcə akademik maraqları deyil, idman və yaradıcılıq sahəsində də uğurları var.

2024-cü il Nilufərin idmanda ilk ciddi uğurunu qeyd etdiyi tarix olub. O, "Açıq şəhər birinciliyi üzrə" keçirilən üzgüçülük yarışında sərbəst üsul üzrə layiqli mübarizə apararaq 2-ci yerin sahibi olub. Bu nəticə təkcə onun güc və texnikasının deyil, eyni zamanda iradəsinin və əzmkarlığının göstəricisidir.

Bu il isə onun yaradıcılıq və incəsənət sahəsində özünü göstərdiyi il kimi yadda qalıb. Nilufər 8 Mart - Beynəlxalq Qadınlar Gününə həsr olunmuş rəsm müsabiqəsində rənglərin dili ilə duyğularını ifadə edərək 1-ci yerin qalibi olub. Bu qalibiyyət onun estetik zövqünün və incə dünyagörüşünün parlaq sübutudur.

Nilufərin nailiyyətləri bununla da bitmir. O, bu ilin 22 iyununda keçirilən "Yay kuboku"na həsr olunmuş Gimnastika üzrə açıq çempionatında isə Nilufər yenidən özünü sınayıb və burada da yüksək nəticə göstərərək 2-ci yerə layiq görülüb.

Böyük arzular və məqsədyönlü zəhmət kiçik yaşdan insanı irəli aparır. Nilufərin hekayəsi də bunun canlı sübutudur.

Hələ qarşıda onu gözləyən fəth edəcəyi çoxlu zirvələr, qalib olacağı neçə-neçə yarışlar, medal kolleksiyasına əlavə edəcəyi uğurlar var. O, indidən böyük həvəs və inamla, addım-addım öz uğur yolunu qurur.

Qaliblər də məhz uğur, iradə və zəhmətin birləşdiyi yerdə doğulurlar.

Amma bu, hələ başlanğıcdır…