Araşdırmalar göstərir ki, insanlar qadın alimlərə daha çox etibar edirlər.

“Azərbaycan müəllimi” xəbər verir ki, Luisvill və Florida universitetlərinin araşdırmaçılarının apardığı tədqiqata görə, insanlar qadın alimlərin təqdim etdiyi elmi nəticələrə daha çox inanırlar. Araşdırmanın nəticəsi “Science Communication” jurnalında dərc olunub.

Bu araşdırma elmdə cinsiyyətlə bağlı ənənəvi stereotipləri çürüdərək qadın alimlərin daha çox kompetent və bəyənilən olduğunu ortaya qoyub.

Yüksək nüfuzlu qadınlar, məsələn alimlər həm etibarlı, həm də sevilən olmağa çalışarkən ikiqat çətinliklə üzləşirlər. Buna baxmayaraq, araşdırma qadın alimlərin daha çox bəyənildiyini və bunun onların kompetensiya səviyyəsini artırdığını göstərib. 

Tədqiqatda iştirakçılara həm kişi, həm də qadın alimlərin eyni elmi məlumatları təqdim etdiyi şəkillər göstərilib. Qadın alimlər 4.12 (7-dən) bəyənmə balı alarkən kişi alimlər 3.43 bal alıb. Tədqiqat qadın alimlərin daha çox bəyənilməsinin onların daha kompetent kimi qiymətləndirilməsinə səbəb olduğunu və bunun “halo effekti”ni yaratdığını göstərib. 

Tədqiqatın digər maraqlı nəticəsi isə həm qadın, həm də kişilərin qadın alimləri daha üstün tutduğudur. Bu insanların öz cinsindən olan alimləri daha çox bəyənməsi gözləniləndən fərqli nəticə idi. Araşdırma həmçinin qadın alimlərin elmi nəticələrinə olan etibarın cinsiyyət və siyasi ideologiya ilə əlaqədar olmadığını da müəyyən edib. 

Bu araşdırma qadınların elmdə daha çox təmsil olunmasının əhəmiyyətini və elmin daha etibarlı və yaxın hiss edilməsinin vacibliyini bir daha vurğulayır. 

Ətraflı buradan oxuya bilərsiniz.