Bu gündən etibarən müəllimlərin iş yerinin dəyişdirilməsi müsabiqəsinin elektron sənəd qəbulu mərhələsinə start verilib.  

Məktəbəqədər və Ümumi Təhsil üzrə Dövlət Agentliyindən “Azərbaycan müəllimi”nə verilən məlumata görə, müsabiqədə dövlət ümumi təhsil müəssisələrində müddətsiz müqavilə əsasında fasiləsiz olaraq 3 tədris ili çalışan şəxslər iştirak edə bilərlər.  

Qeyd olunur ki, təhsilverənlərin sertifikatlaşdırılması (test və müsahibə mərhələsində uğur qazananlar), müəllimlərin işə qəbulu müsabiqəsi və ya diaqnostik qiymətləndirmədə iki və ya daha çox iştirak edən müəllimlər üstünlük verdikləri balla müsabiqəyə qatılmaq hüququna malikdirlər.  
Müəllimlərə qeydiyyatdan keçərkən və sənədləri yükləyərkən diqqətli olmaq tövsiyə edilir.  
Müsabiqə şərtlərinə uyğun olaraq, sosial amillərlə bağlı elektron ərizəyə yüklənilməli sənədlər: 
- Əri və ya arvadı hərbçi olduqda: 
- Nikah haqqında şəhadətnamənin surəti;  
- Ər və ya arvadın hərbçi olduğunu təsdiq edən vəsiqə və ya arayışın surəti.  

- Şəhid ailəsi üzvü olduqda:
- Şəhid ailəsi üzvü olduğunu təsdiq edən sənəd və ya vəsiqənin (doğum haqqında şəhadətnamənin) surəti.  

- İş yerini faktiki yaşayış yeri və ya qeydiyyatda olduğu ərazidə yerləşən həvəsləndirmə tədbirləri tətbiq edilən müəssisəyə dəyişdirdikdə: 
 - Həmin ərazidə yaşadığını və ya qeydiyyatda olduğunu təsdiq edən sənədin surəti.  

- Yuxarıda qeyd olunan şərtləri ödədikdə:
 - Sosial amilləri təsdiq edən bütün sənədlərin surəti.  

Qeyd olunan sənədlərin hər biri bir vahid faylda toplanaraq elektron ərizəyə yüklənməlidir.  

Müəllimlər 10 aprel saat 11:00-dək https://www.miq.edu.az/yerdeyishme linkinə daxil olaraq müsabiqədə iştirak üçün qeydiyyatdan keçə bilərlər. Elektron ərizələrin qəbulu mərhələsi başa çatdıqdan sonra müsabiqənin növbəti – vakansiya seçimi mərhələsi barədə ictimaiyyətə məlumat veriləcək.  

Daha ətraflı məlumat üçün müsabiqəyə dair sual-cavabla https://www.miq.edu.az/yerdeyishme/faq tanış ola bilərsiniz.