Təhsil müəssisələrində təlim-tədris prosesinin keyfiyyəti və uşaqların təhlükəsizliyi, eləcə də onların sağlamlığı daim diqqət mərkəzində saxlanılır. Bu baxımdan payız-qış mövsümündə ümumi təhsil müəssisələrinin istilik təchizatı xüsusi əhəmiyyət kəsb edir.

Bu barədə Quba-Xaçmaz Regional Təhsil İdarəsindən "Azərbaycan müəllimi"nə verilən açıqlamada qeyd olunub.

Bildirilib ki, payız-qış mövsümünə hazırlıq məqsədilə təhsil müəssisələrinin istilik sistemləri və qazanxanalarının sazlığına nəzarət edilir. Müəssisələrin istilik təminatında yarana biləcək problemlərin əvvəlcədən müəyyən edilməsi və aradan qaldırılması üçün istilik sistemlərinin yoxlanması həyata keçirilib.

Quba-Xaçmaz Regional Təhsil İdarəsinin tabeliyində ümumilikdə 394 ümumi və 59 məktəbəqədər təhsil müəssisəsi fəaliyyət göstərir. Təhsil müəssisələrinin fasiləsiz şəkildə istiliklə təmin edilməsi üçün 2160.50 kubmetr odun artıq müəssisələrə təhvil verilib  və bu proses hazırda da davam edir. 

Yanacaq tədarükçüləri ilə təhsil müəssisələrinin istilik təminatına dair imzalanan müqavilələr əsasında yanacaq təchizatı həyata keçirilir. Yaranacaq xüsusi hallarla bağlı idarəyə daxil olan müraciətlər operativ şəkildə qeydiyyata alınır, təhlillər aparılır və müvafiq tədbirlər görülür.