Xəbər verdiyimiz kimi, bir müddət öncə Respublika fənn olimpiadalarının (RFO) rayon turunun nəticələri açıqlanıb. Hazırda region üzrə məktəblilər Olimpiadalara Hazırlıq Mərkəzlərində növbəti tura hazırlaşırlar. 

"Azərbaycan müəllimi" olaraq Neftçala üzrə olimpiadalara hazırlıq mərkəzində olub, burada fəaliyyət göstərən bir neçə müəllimlə söhbətləşdik. 

“Fənn olimpiadalarında hər il medallar qazanırıq”

Biqəm Fərhadlı Neftçala şəhər E.Həbibov adına 4 nömrəli tam orta məktəbin Azərbaycan dili və ədəbiyyat müəllimidir. Müəllimlərin işə qəbulu imtahanında 79.75 bal toplayıb, 2 ildir ki, RFO hazırlığı ilə məşğuldur. Ötən tədris ilində şagirdlərindən Mehriban Musazadə RFO-da bürünc medal əldə edib. Digər şagirdi Ayxan Musazadə isə RFO finalçısı olub. 

B.Fərhadlı olimpiadanın növbəti turuna hazırlıqla bağlı fikirlərini bölüşür:

Bu il də işlədiyim məktəbin X sinif şagirdi İsa Ələkbərzadə və VIII sinif şagirdi Məryəm Məmmədli fənn olimpiadalarının 1-ci mərhələsini keçiblər və növbəti tura hazırlaşırıq. Əsas problemimiz fənn olimpiadaları ilə bağlı olan vəsaitlərin az olmasıdır. Buna baxmayaraq müxtəlif nəşriyyatların testlərini əldə edərək şagirdlərə işlədirəm. Əlavə olaraq özüm də olimpiada səviyyəsində düşündürücü suallar hazırlayıram. RFO-ya maraq məktəbimizdə həmişə olub, hər il medallar qazanmışıq. Məktəb rəhbərliyi həm müəllimlər, həm də şagirdlər arasında RFO-ya yüksək maraq yaradıb və bununla bağlı maarifləndirici işlər aparır".

“Olimpiadalara aşağı siniflərdən maraq oyatmaq lazımdır”

Daha bir müsahibimiz kimya müəllimi Lalə Əzizovadır. O, müəllimlərin diaqnostik qiymətləndirmə imtahanında 57 bal toplayıb. Müəllimlər arasında keçirilmiş Polad Həşimov adına Zəfər olimpidasında 3-cü yeri tutub. 

Lalə Əzizova olimpiada hazırlıqları barədə danışır: 

Əvvəlki illərdə bir neçə şagirdim fənn olimpiadalarının qalibi olub. Dərsləri həm əyani, həm də onlayn keçirəm. Dərs prosesində müxtəlif materiallardan və hazırladığım video izahlardan istifadə edirəm. Olimpiadalara şagirdlərdə aşağı siniflərdən maraq oyatmaq lazımdır. Davamlı məşğul olduqda və qarşıya məqsəd qoyduqda istədiyin nəticəyə nail olmaq olar. Bizim şagirdlər üçün olimpiadalara dəstək “YouTube” kanalımız da var.

Yetirməsi qızıl medal qazanıb

Növbəti müsahibimiz Dilarə Səfərova S.İmanov adına 1 nömrəli tam orta məktəbin Azərbaycan dili və ədəbiyyat müəllimidir. 2022-2023-cü tədris ilində 9-cu sinif şagirdi Nurlana Məmmədzadə Respublika fənn olimpiadalarında qızıl medal əldə edib. 

Hazırlıq prosesində siniflər üzrə dərsliklərdən, lüğətlərdən, bədii ədəbiyyatdan, şifahi xalq ədəbiyyatından, testlərdən, eləcə də olimpiada materialları və əvvəlki illərin sual kitabçalarından istifadə edirəm. Həmçinin şagirdlərə olimpiada hazırlıqlarında dəstək göstərmək üçün “YouTube” kanalı da yaratmışıq. 

Digər müsahibimiz, müəllimlərin diaqnostik imtahanında 53 bal toplamış Ülfət Məmmədova da S.İmanov adına 1 nömrəli tam orta məktəbin fizika müəllimidir. Onun sözlərinə görə, 2022-2023-cü tədris ilində 10-cu sinif şagirdi İdris Quluzadə olimpiada finalçısı olub. İ.Quluzadə Olimpiadaya Hazırlıq Mərkəzində dərsliklərdən, əvvəlki illərin olimpiada sual kitabçalarından istifadə etdiyini deyir.
 
Qeyd edək ki, Neftçala rayonunun Olimpiadaya Hazırlıq Mərkəzi S.İmanov adına 1 nömrəli tam orta məktəbdə fəaliyyət göstərir. Mərkəzdə olimpiadanın rayon (şəhər) turuna hazırlaşan 400 şagird ilə 8 müəllim məşğul olub. Onların 120-si növbəti tura keçib. Mərkəzə sertifikasiya imtahanlarında yüksək nəticə göstərmiş və şagirdləri olimpiadada uğur qazanmış müəllimlər cəlb edilib.