Sumqayıt Dövlət Universiteti (SDU) 2024-cü ildə 10 əsas nailiyyəti ilə yadda qalıb.

“Azərbaycan müəllimi” xəbər verir ki, bu barədə SDU-nun rektoru Rüfət Əzizov sosial media hesabında paylaşım edib.

Belə ki, SDU QS Avropa Universitetləri Reytinqində ilk dəfə iştirak edərək Avropada 483-cü, Qərbi Asiya universitetləri arasında 31-ci yeri tutdu.

SDU dünyanın ən yaxşı universitetlərindən olan Oksford Universiteti ilə COP29 çərçivəsində birgə qlobal layihələr həyata keçirib. Qeyd edək ki, bu layihədə 58 ölkədən 1035 nəfər iştirak edib. Layihənin final mərhələsi COP29 çərçivəsində Bakıda keçirilib.

İlk dəfə olaraq SDU-da Sabah Qrupları açılıb. 3 magistratura və 1 bakalavr Sabah Proqramı start götürüb. 

BP şirkəti SDU-da 5 kimya laboratoriyasının yenidən qurulmasına maliyyə dəstəyi ayırıb. “Kapital Bank”ın dəstəyi ilə 2 kompüter laboratoriyası qurulub. Özəl sektorun dəstəyi artıb. 

İlk dəfə olaraq, SDU sənayedən təlim sifarişi alıb. STP-nin sifarişi ilə 200+ nəfərə təlim keçirilib.

Universitetin qəbul nəticələri əhəmiyyətli dərəcədə yaxşılaşıb.Belə ki,  tələbə sayı 6500 nəfərə yaxınlaşıb. 500-dən artıq bal toplayıb SDU-ya qəbul olanların sayı 20 dəfə, 400-dən artıq bal toplayıb SDU qəbul olanların sayı isə 5 dəfə artıb. Həmçinin 600-dən artıq bal toplayan tələbə SDU-nu seçib.

SDU-nun impakt faktorlu jurnallarda çap olunan məqalə sayı 46 olub. Bu isə keçənilki nəticədən 35% çoxdur.

Tələbə və müəllim mobilliyi artdı. Universitetin müəllim və tələbələri 28 xarici səfərdə olub. Orta Doğu Texniki Universitetindən müəllimlər tədrisə cəlb olunub. Türkiyə ilə ilk tələbə mübadiləsi proqramı baş tutub. Qazaxstan və Özbəkistan universitetləri ilə elmi əməkdaşlığa start verilib. Əcnəbi tələbələrin sayı təxminən 2 dəfə artaraq 46 olub.

Universitetin idarəetmə və struktur yenilənib. Kafedraların sayı optimallaşdırılaraq 29-dan 18-ə endirilib. Tələbə sayı 5% artmasına baxmayaraq, dərs yükü optimallaşdırılma nəticəsində təxmini 20% azalaraq 270 min saatdan, 220 min saata düşüb.

Professor - müəllim heyətinin mərhələli şəkildə (son 1 ildə 2 dəfə) maaşı ortalama 28%, inzibati heyətin ortalama 25%, tədris köməkçi heyətin ortalama 20% artırılıb.