11-12 yanvar tarixlərində Azərbaycan-Fransız Universitetində (UFAZ) Sahibkarlıq və İnnovasiya Mərkəzi ilə UFAZ Kimya mühəndisliyi klubu tərəfindən Yaşıl Kimya Hakatonu keçirilib. 

Bu barədə universitetdən “Azərbaycan müəllimi”nə məlimat verilib. Bildirilib ki, tədbiri giriş sözü ilə açan UFAZ-ın icraçı direktoru vəzifəsini müvəqqəti icra edən Lətifə Nəsibova belə təşəbbüslərin gənclərin potensialının üzə çıxarılmasında mühüm rol oynadığını deyib. Sonra mentorlar və münsiflər heyətinin üzvləri iştirakçılara təqdim olunub. Hakatonun ilk günündə müxtəlif universitetlərdən olan komandalar püşkatma yolu ilə mövzuları seçdikdən sonra təqdim olunan problemə həll yolu tapmaq üçün çalışıblar. İkinci gün isə komandalar hazırladıqları həlləri münsiflər heyətinə təqdim edərək onların suallarını cavablandırıblar. 

Sonda ən uğurlu təqdimatla çıxış edən 3 komanda qalib gəlib. Birinci yerə UFAZ tələbələrindən ibarət “Algenix”, ikinci yerə Dövlət Gömrük Komitəsinin tələbələrindən ibarət “Bitbybit”, üçüncü yerə isə yenə UFAZ tələbələrindən ibarət “Slay” adlı komanda layiq görülüb. 

Qeyd edək ki, tədbir yaşıl kimya ilə bağlı real problemlərin həllinə töhfə vermək və daha davamlı gələcək üçün innovativ həllərin hazırlanmasını təşviq etmək məqsədi daşıyıb.

Hakaton Azərbaycanın müxtəlif universitetlərindən olan tələbələri və mütəxəssisləri bir araya gətirərək əməkdaşlıq üçün unikal mühit yaradıb. İştirakçılar komanda halında ekoloji problemlərin aradan qaldırılmasına yönəlmiş həllər tapmaq üçün çalışıb və yarışma boyunca peşəkar mentorların dəstəyindən yararlanıblar.