“Biz xarici tərəfdaşlarla birgə təhsil sahəsində müəyyən əlaqələr qurmağı bacarmışıq. İkili diplom proqramları, tələbə mobilliyi və digər sahələrdə irəliləyiş var, amma elmi sahədə beynəlxalq əlaqələrimiz hələ kifayət qədər inkişaf etməyib. Bu problem mövcuddur. Say artmış ola bilər, amma keyfiyyət və effektivlik istənilən səviyyədə deyil”.

“Azərbaycan müəllimi” xəbər verir ki, bu fikirləri bu gün “THE Avrasiya Universitetləri Sammiti” çərçivəsində təşkil edilən "ProQuest Central" akademik informasiya bazasının açılış mərasimində Elm və Ali Təhsil üzrə Dövlət Agentliyinin direktoru Ülkər Səttarova səsləndirib. O əlavə edib ki, bu sahəni inkişaf etdirmək vacibdir:

“Belə resurslara və alətlərə çıxış olmadan müasir dünyada rəqabət aparmaq çətinləşir və düşünürük ki, yeni imkanlar bunun üçün açar rolunu oynayacaq. Kollaborativ (bir necə müəllifin birgə yazdığı məqalə) məqalələrin sayı kifayət qədər deyil və bu sahədə fəaliyyətimizi artırmalıyıq. Digər tərəfdən, sənaye ilə müəssisələrin əməkdaşlığı nəticəsində ərsəyə gələn məqalələrin sayı ölkə üzrə cəmi 2,5%-dir ki, bu da çox aşağı göstəricidir. Burada da səylərimizi artırmalıyıq. Bu kimi imkanlar elmi məhsuldarlığın sayını xeyli artıracaq və ümid edirik ki, gələcəkdə sənaye ilə əməkdaşlıq edən müəssisələrin sayı artacaq”.

Agentlik rəhbərinin sözlərinə görə, uzun illərdir “Clarivate” ilə əməkdaşlıq edilir. Əsas məqsəd alimlərimizin yüksəkkeyfiyyətli elmi nailiyyətlər əldə etməsinə imkan yaratmaqdır:

“Biz düşünürük ki, belə bazalara çıxışın hamı üçün əlçatan olması vacibdir. Nəzərinizə çatdırım ki, son illər ərzində bu imkanlar artıb. Keyfiyyətli elmi məhsulumuzun sayı əhəmiyyətli dərəcədə artıb. Yəni son 3 il ərzində Q1 və Q2 kateqoriyalarında olan məqalələrin sayı 65%-dən 2025-ci ildə 77%-ə çatıb. Beləliklə, Azərbaycan həm kəmiyyət, həm də keyfiyyət üzrə regionun lideridir”.