Uşaq müəssisələri uşaqların psixoloji, sosial inkişafına kömək edəcək proqramlar hazırlamalı, həyata keçirməli və qiymətləndirməlidir.

“Azəbaycan müəllimi” xəbər verir ki, bu, Nazirlər Kabinetinin təsdiqlədiyi “Dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələblər”də öz əksini tapıb.

Sənəddə müəssisələrdə sağlamlığın mühafizəsinə dair tələblər də müəyyən edilib.

Həmin tələblərə görə, uşaqlar müəssisənin yerləşdiyi ərazi üzrə tibb müəssisəsində uçota götürülməli, onların icbari dispanserizasiyadan keçirilməsi nəzarətdə saxlanılmalıdır. Tibbi müayinə və nəzarətə ehtiyacı olan uşaqlar dövlət tibb müəssisələrinə müayinə və müddətli müalicəyə təxirə salınmadan göndərilməli, epidemioloji və yoluxucu xəstəliklər, təbii fəlakətlər zamanı lazımi profilaktik tədbirlər görülməli, uşaqlar yerli milli peyvənd təqviminə əsasən immunizasiyaya cəlb edilməlidir. Müəssisədə siyahısı Səhiyyə Nazirliyi ilə razılaşdırılmış lazımi dərman və tibb vasitələri ilə təchiz olunmuş tibb otağı yaradılmalıdır. 

Müəssisədə yaşayan uşaqların sağlamlığının qorunması məqsədilə stasionar müəssisələr müvafiq təcridetmə otağı ilə təmin edilməli, yoluxucu xəstəlik əlamətləri aşkar edilən şəxslər ilkin tibbi müayinədən keçənədək təcrid otağında saxlanılmalıdır. Aşkar olunmuş bütün invaziyalaşmış uşaqların adı “Yoluxucu xəstəliklər” jurnalında qeydə alınaraq dərhal müalicəyə cəlb edilməlidir. Uşağın səhhətində irəliləyişin müəyyən edilməsi məqsədilə təkrar qiymətləndirmə aparılmalıdır. Uşaqların fərdi-psixoloji vəziyyəti qiymətləndirilməli, nəticədən asılı olaraq müvafiq psixoloji yardım göstərilməli, psixoloji, sosial inkişafı davamlı olaraq izlənilməlidir. Müxtəlif səbəblərdən müəssisəni tərk edəcək uşaqla onun yeni mühitə psixo-sosial adaptasiyası məqsədilə psixoloji söhbətlər aparılmalı, psixoloji dəstək göstərilməlidir.