Kitab insanın içindəki dünyaya açılan qapıdır. Hər bir səhifə yeni bir aləmə keçid, hər hekayə yeni bir macəranın başlanğıcıdır.

14 Fevral Beynəlxalq Kitab Bağışlama Günü kimi təqvimə düşüb. Bu gün bizə kitab oxumağın və onu paylaşmağın əhəmiyyətini bir daha xatırladır. 
Kitab oxuma bacarığımız hələ uşaqlıqda formalaşmağa başlayır. Uşaqlarda kitab oxumağa həvəs yaratmaq üçün onların səviyyələrinə uyğun ədəbiyyat nümunələri təqdim edilməlidir. Hekayələr, nağıllar, rəngarəng təsvirlərlə dolu səhifələr uşağın fantaziyasının, düşüncə və hisslərinin inkişafına kömək edir. Uşaq ədəbiyyatı da bu missiyanı yerinə yetirərək azyaşlıların mənəvi və intellektual tərbiyəsində böyük rol oynayır.  

Uşaq ədəbiyyatı nümunələrinə tələbatla bağlı “Azərbaycan müəllimi”nə danışan “Qanun” nəşriyyatın direktoru Şahbaz Xuduoğlu bildirib ki, övladları ilə kitab almağa gələn valideynlər onların seçiminə üstünlük verirlər:

“Uşaq ədəbiyyatına maraq böyükdür və bu maraq getdikcə artır. Valideynlərin övladına istədiyi kitabı seçməyinə şərait yaratdığını müşahidə edirəm. Azyaşlılar üçün adətən, şəkilli, poliqrafik baxımdan yüksəkkeyfiyyətli kitabları almağı üstün tuturlar. Uşaq inkişafı, valideyn-övlad münasibətləri, uşağı düzgün böyütməyin yolları, eləcə də müxtəlif təlim proqramları, autizm və s. ilə bağlı kitablara daha çox üstünlük verilir”. 

Uşaq ədəbiyyatı müəllifləri arasında yerli, yoxsa xarici yazıçıların əsərlərinin daha çox oxunduğu məsələsinə toxunan Ş.Xuduoğlu yaxın vaxtlarda yerli müəlliflərin imzalarının da bestsellerlər arasına düşəcəyinə ümid edir:

“Uşaq ədəbiyyatı Azərbaycanda çox da populyar sahə deyil. Buna görə daha çox tərcümə ədəbiyyatına yer verilir. Uşaqların ədəbiyyata, kitaba marağı get-gedə artdığı üçün ümid edirəm ki, yerli müəlliflərin də əsərləri çox oxunacaq”. 

“Libraff” kitab mağazaları şəbəkəsi və “TEAS Press” nəşriyyat evinin PR mütəxəssisi Sərxan Rüstəmov qeyd edir ki, artıq məktəbəqədər yaşlı uşaqların valideynləri onların inkişafına, söz ehtiyatlarının artırılmasına xüsusi diqqət ayırırlar:

“Uşaq ədəbiyyatına tələb böyükdür. Satış rəqəmləri də onu göstərir ki, valideynlər övladlarına daim kitab almağa çalışırlar. Kitab sərgiləri zamanı bu marağı xüsusilə hiss edirik. Daha çox məktəbəqədər yaşlı uşaqlar üçün olan kitablara tələbat var. Düşünürəm ki, yaş artdıqca, məktəb dərsləri çətinləşdikcə uşaqlarda kitab oxuma vərdişləri müəyyən qədər azalır. Altı yaşa qədər olan uşaqlar üçün nəzərdə tutulan kitablara maraq daha çoxdur”.

S.Rüstəmov bildirir ki, məktəbəqədər yaşlı uşaqlar üçün rəngli, illüstrasiyalı, mətn hissəsi daha az olan kitablar daha maraqlıdır. Valideyn ona şəkli göstərərək nağılı, hekayəni təsvir edə bilər: 

“Dünya uşaq ədəbiyyatı nümunələri də dilimizə tərcümə edilir, demək olar ki, uşaq kitabxanasına aid klassik ədəbiyyatın əsas əsərləri əlçatandır. Xarici müəlliflərin kitablarının sayı çox olduğuna görə satış sayı da yüksəkdir. Sayları çox olmasa da, Azərbaycan dilində də uşaq ədəbiyyatı nümunələri yaradan müəlliflər var. Onların bəzilərinin əsərləri “bestseller”lər arasına daxil olur”, – deyə o bildirib.