Gənclərin xarici ölkələrin nüfuzlu ali təhsil müəssisələrində təhsil almalarına dair Dövlət Proqramı iştirakçılarının doktorantura səviyyəsi üzrə seçiminə dair meyarlar müəyyənləşib.

Dövlət Proqramı İdarəetmə Qrupunun rəhbəri Turan Topalova Nazirlər Kabinetinin verdiyi qərarla bağlı “Azərbaycan müəllimi”nə açıqlama verərək deyib ki, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-ci illər üçün Dövlət Proqramı”nın müddəti 2028-ci ilədək uzadılıb və qəbul üzrə kvota sayı 500 nəfər müəyyən olunub. 2025-ci ildən başlayaraq kvotanın 25 faizindən çox olmayan hissəsi bakalavriat, 20 faizindən çox olmayan hissəsi doktorantura səviyyəsini əhatə edib. NK-nın bu qərarı ilə Dövlət Proqramı çərçivəsində doktorantura təhsili almaq istəyənlər üçün seçim meyarları təsdiqlənib: “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı” 2025-2026-cı tədris ilindən etibarən bakalavriat, magistratura və doktorantura səviyyələrinə tələbə qəbulunu həyata keçirməyə imkan yaradır. Bununla əlaqədar Dövlət Proqramına aid olan normativ sənədlərdə dəyişiklik edilib. Nəticə etibarilə doktoranturaya qəbul və maliyyələşmə qaydaları təsdiqlənib”.    

T.Topalova dəyişikliklərin mahiyyətini də açıqlayıb: “2022-2028-ci illərə aid olan qaydalar 2022-2026-cı illərə aid olan qaydalarla uyğunlaşdırılıb. Bundan başqa, kiçik dəyişiklik var. Belə ki, doktorantura təhsili üçün tələb edilən sənədlərin siyahısında kiçik dəyişiklik edilib və sənəd sayı azaldılıb. “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”nda 2000 sözdən ibarət tədqiqat işi istənilirdi. Lakin bu, sonradan əhəmiyyətsiz hesab edildiyindən tələblər siyahısından çıxarılıb”.

Turan Topalova doktorantura təhsil səviyyəsi üzrə indiyədək olan nəticələrə də toxunub: “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində 284 nəfər təhsil almaq hüququ əldə edib. Onların 7-si məzun olub və ölkənin ali təhsil müəssisələrində dərs keçir”.