Sinerjinin gücü: birgə öyrənmədən birgə uğura – Müəllimin pedaqoji gündəliyindən
Təhsilə faydalı olmaq şüarı ilə başladığım bu yolda əsas qayəm cəmiyyət üçün kamil vətəndaşlar yetişdirməyin verdiyi o misilsiz qürur hissini yaşamaqdır. Lakin müasir təhsil mühitində sadəcə sevgi kifayət etmir; bu sevgini doğru metodologiya və innovativ yanaşmalarla birləşdirmək mütləqdir.
Dərslərimdə hər zaman tədris prosesini şagirdlərimin maraq dünyasına uyğun qurmağa, onların daxili potensialını üzə çıxarmağa çalışıram. Bu axtarışlar içində mənim üçün ən önəmli və təsirli məqamlardan biri qrup və cütlərlə iş zamanı yaranan "sinerji" fenomenidir. Yunanca "synergos" sözündən yaranan sinerji, iki və ya daha çox elementin birləşərək, ayrı-ayrılıqda göstərə bilmədikləri performansdan çox daha böyük bir nəticə ortaya qoyması deməkdir. Elm dünyasında bu prinsip çox vaxt 1+1=3 düsturu ilə ifadə olunur. Bu, riyazi bir xəta deyil, kollektiv zəkanın möcüzəsidir.
Məktəb mühitində sinerji – şagirdlərin fərdi güclərini, fərqli baxış bucaqlarını və bacarıqlarını bir araya gətirərək, təkbaşına öhdəsindən gələ bilməyəcəkləri uğurlara imza atmalarıdır. Sinifdə sağlam bir sinerji mühiti yaratmaq üçün işin şagirdlər arasında düzgün bölüşdürülməsi, hər kəsin fəaliyyətə aktiv cəlb olunması və qarşılıqlı hörmət əsas şərtdir. Bu prosesdə şagird təkcə problemi birgə həll etməyi deyil, həm də öz fikrini sərbəst ifadə etmək, başqalarını dinləmək və obyektiv qərarlar qəbul etmək kimi mühüm sosial bacarıqlar qazanır.
Mən bu üsulu təkcə şagirdlər arasında deyil, eyni zamanda müəllim-şagird əməkdaşlığında, həmkarlar arası münasibətlərdə və ailə-məktəb birliyində də tətbiq etməyin tərəfdarıyam. Çünki təhsil bir tərəfli deyil, bütün tərəflərin eyni hədəfə fokuslandığı bir ekosistemdir. Sinerji yaratmaq tədrisdə liderlik, zamanın effektiv idarə edilməsi və yaradıcı düşüncə kimi real həyati bacarıqları formalaşdırır, uşaqlarda birgə məsuliyyət hissini artırır. Bu mühitdə yetişən uşaq gələcəkdə rəqabəti deyil, həmrəyliyi üstün tutan uğurlu bir fərdə çevrilir. Məhz bu səbəbdən, dərslərimdə fərdi qəhrəmanlıqları deyil, kollektiv ruhun doğurduğu o möcüzəvi enerjini – sinerjini hər zaman ön plana çəkirəm. İnanıram ki, hər bir şagird bu enerjinin bir parçası olduqda, təhsil sadəcə öyrənmək deyil, həm də birgə böyümək və kəşf etmək yoluna çevrilir.
Ayşən Bəxtiyarova,
Bakı şəhər 263 nömrəli tam orta ümumtəhsil məktəbin ibtidai sinif müəllimi
Bu yazı “Azərbaycan müəllimi” qəzeti və Azərbaycan Gənc Müəllimlər Assosiasiyasının həyata keçirdiyi “Müəllimin pedaqoji gündəliyi” layihəsi çərçivəsində dərc olunur.
