Nazir müavini: Uzunmüddətli uğurun əsas hərəkətverici qüvvəsi insan kapitalıdır
"Yollar, limanlar, sənaye parkları və texnologiyalar mühümdür, lakin insan kapitalı olmadan onlar sadəcə infrastruktur olaraq qalır. Güclü insan kapitalı ilə isə onlar inkişafın mühərrikinə çevrilir. Məhz buna görə bu mərkəz yalnız təhsil təşəbbüsü deyil. Bu, Azərbaycanın gələcəyinə yönəlmiş strateji investisiyadır".
"Azərbaycan müəllimi" xəbər verir ki, bu fikirləri iqtisadiyyat nazirinin müavini Elnur Əliyev "IE Liderlik və İnnovasiya" Mərkəzinin yaranmasına dair Anlaşma Memorandumunun imzalanması mərasimində söyləyib.
Nazir müavini bildirib ki, bu mərkəz akademik və intellektual institutları, yəni universitetləri əhatə edir və İspaniya ilə əməkdaşlığa yeni dinamika qazandırır: "Bizim üçün bu layihə daha geniş məna daşıyır. Bu, insanlar haqqındadır. Bu, istedad haqqındadır. Bu, qlobal düşünə bilən, yaradıcı şəkildə hərəkət edən və gələcəyin iqtisadiyyatını qura biləcək yeni liderlər nəslinin hazırlanması haqqındadır.
Bu gün Azərbaycan sabit, dinamik və ambisiyalı bir ölkədir. Biz infrastrukturun inkişafına, bağlantıların gücləndirilməsinə, sənaye zonalarına, rəqəmsal transformasiyaya və beynəlxalq tərəfdaşlıqlara investisiya yatırırıq. Coğrafi mövqeyimiz bizə strateji üstünlük verir. İqtisadi siyasətimiz bizə istiqamət göstərir, lakin uzunmüddətli uğurun əsas hərəkətverici qüvvəsi insan kapitalıdır".
Nazir müavini həmçinin qeyd edib ki, bu mərkəz həm dövlət, həm də biznes və beynəlxalq tərəfdaşların necə birgə fəaliyyət göstərə biləcəyinin yaxşı nümunəsidir: "Xüsusilə "PASHA Holding" və SOCAR-ın rolunu qeyd etmək istərdim. Onların iştirakı göstərir ki, özəl sektorumuz bir mühüm həqiqəti aydın şəkildə anlayır: insanlara investisiya qoyuluşu bütün investisiyalar arasında ən vacibidir.
Bu təşəbbüs eyni zamanda Azərbaycan–İspaniya münasibətlərinə yeni ölçü əlavə edir. Ölkələrimiz artıq ticarət, investisiya, enerji, nəqliyyat, mədəniyyət, texnologiya və innovasiya sahələrində əməkdaşlıq edir. Strateji iqtisadi dialoq və qəbul olunmuş yol xəritəsi əməkdaşlığımızın daha da dərinləşdirilməsi üçün praktik əsas yaradır.
Bu kontekstdə Prezident İlham Əliyev və Baş nazir Pedro Sançes səviyyəsində razılaşdırılmış Azərbaycan–İspaniya universitetinin gələcəkdə yaradılması təhsil, elm, innovasiya və insan kapitalının inkişafı sahələrində əməkdaşlığımızın daha da institusionallaşdırılması baxımından ikitərəfli gündəliyimizdə mühüm mərhələyə çevriləcək və cəmiyyətlərimiz arasında davamlı bir körpü yaradacaq", – deyə o qeyd edib.
