"STEAM tədrisinin əhatə dairəsi gün-gündən böyüyür və artıq regionlarımızda 23 STEAM Mərkəzi fəaliyyət göstərir".

"Azərbaycan müəllimi" xəbər verir ki, bunu "STEAM Azərbaycan" layihəsinin rəhbəri İqrar Nəzərov Beynəlxalq Yaşıl STEAM Azərbaycan Festivalının açılış mərasimində çıxışı zamanı deyib.

O bildirib ki, işğaldan azad olunmuş bölgələrimizdə tikilən məktəblərdə də STEAM kabinetləri və STEAM mərkəzləri yaradılır.

"Sevindirici haldır ki, bu il ilk dəfə işğaldan azad edilmiş ərazilərimizdə yeni qurulan məktəblərin şagirdləri də SAF-da iştirak edirlər. Ümumilikdə festival çərçivəsində 600-dən çox komanda qeydiyyat prosesində iştirak edib. 4 il əvvəlki festivalda yalnız öz ölkəmizdən şagird və tələbələr iştiraak edirdisə, artıq 15-dən çox ölkənin şagirdləri festival qatılıb. Hər il olduğu kimi bu il də biz məzmunun hazırlanmasında xarici tərəfdaşlarla birgə çalışmışıq".

İqrar Nəzərov əlavə edib ki, STEAM təhsili və yeni metodologiyalar istiqamətində axtarış və tədqiqatlar davam edir.

"Müxtəlif ölkələrin təcrübələri öyrənilir və onlar milli kurikuluma adaptasiya olunaraq, məktəblərdə dərsdənkənar fəaliyyət kimi tədris olunur. Bununla yanaşı Azərbaycan bir sıra ölkələrdə STEAM tədrisinin qurulmasına da dəstək göstərir. Belə ki, Bişkekdə, Daşkənddə STEAM mərkəzlərinin yaradılmasında Azərbaycan yaxından iştirak edir. Həmçinin Qazaxıstandan olan 30 müəllimə STEAM təlimi keçirilib".