Oktyabrın 25-də Beynəlxalq Yaşıl STEAM Azərbaycan Festivalının bağlanış mərasimi keçirilib.

“Azərbaycan müəllimi” xəbər verir ki, bağlanış mərasimində elm və təhsil nazirinin müavini Firudin Qurbanov, iqtisadiyyat nazirinin birinci müavini Elnur Əliyev və digər qonaqlar iştirak ediblər.

Əvvəlcə "STEAM Azərbaycan" layihəsinin rəhbəri İqrar Nəzərov çıxış edərək yarışların nəticələrinə dair hesabatı diqqətə çatdırıb.

O qeyd edib ki, 4 ildir keçirilən STEAM Festivalı artıq üçüncü ildir ki, beynəlxalq formatda təşkil olunur. Bu il festivalda 15 ölkədən gələn iştirakçılar 8 kateqoriya üzrə yarışdılar və ümumilikdə 250-yə yaxın komanda mübarizə apardı. Minə yaxın məktəbli və universitet tələbəsinin qatıldığı bu tədbir müxtəlif ölkələrdən gənclərin bilik və bacarıqlarını nümayiş etdirmələri üçün böyük bir platformadır:

“Festivalın qaydalarına əsasən, iştirakçıların 60%-i mükafatlandırılır ki, bu da onların səylərini dəyərləndirən əhəmiyyətli bir stimuldur. Fərqli yaş kateqoriyaları üzrə müxtəlif nominasiyalar mövcuddur. Aşağı yaş qruplarına daxil olan ibtidai sinif şagirdlərinin hər biri mükafatlandırılıb. Xüsusilə "Gələcəyin mühəndisləri" kateqoriyasında yarışan 33 komandanın hər bir üzvü təltif edilib”.

Layihə rəhbəri əlavə edib ki, festivalın ən çətin kateqoriyalarından biri isə “Hidrogenlə çalışan maşınlar” kateqoriyasıdır. Bu sahədə kifayət qədər çox sayda xarici komanda iştirak edib və ümumilikdə 8 xarici komanda bu kateqoriya üzrə mübarizə aparıb:

“Hidrogen enerjisi sahəsində görülən işlər həm yaşıl enerjiyə, həm də müasir həllərin tapılmasına yönəlib və bu istiqamətdə bizi qarşıda bir çox işlər gözləyir. Festival gənclərin bu kimi qabaqcıl texnologiyalarla tanış olmasına və bu sahəyə yeniliklər gətirməsinə böyük imkan yaradır”.

O, çıxışının sonunda bütün komandaları təbrik edib, ardınca Beynəlxalq Yaşıl STEAM Azərbaycan Festivalına dair videoicmal nümayiş etdirilib.

Daha sonra qalib komandalara mükafatlar təqdim olunub.

Qeyd edək ki, sözügedən festival Elm və Təhsil Nazirliyi və COP29 Sədrliyinin dəstəyi, “STEAM Azərbaycan” layihəsinin təşkilatçılığı ilə keçirilib. Festivalın final mərhələsinə ümumilikdə 244 komanda üzrə 900-dən çox iştirakçı qoşulub və onlardan 146-sı Böyük Britaniya, Türkiyə, Pakistan, Türkmənistan, Qazaxıstan, Çexiya, Slovakiya və ABŞ daxil olmaqla 15 ölkəni təmsil edib. Festival çərçivəsində “Yaşıl təşəbbüslər”, “Yaşıl kodlaşdırma”, “Dron texnologiyaları”, “Bizim peykimiz”, “Robotların mübarizəsi”, “Gələcəyin mühəndisləri” və s. kimi mövzularda 9 kateqoriya üzrə yarış və sərgi-yarışlar təşkil olunub.

Builki festivalın məqsədi ənənəvi olaraq STEAM əsaslı tədrisin təşviqi, təhsilalanlar arasında XXI əsr bacarıqlarının inkişaf etdirilməsi, yaradıcı təhsilalanların aşkara çıxarılması ilə yanaşı, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Azərbaycanda keçirilməsi və 2024-cü ilin ölkəmizdə “Yaşıl dünya naminə həmrəylik ili” elan edilməsi ilə əlaqədar STEAM əsaslı yanaşmanın tətbiqi vasitəsilə ətraf mühitin sağlamlaşdırılması, su ehtiyatları və alternativ enerji mənbələrindən səmərəli istifadəyə dair innovativ həll yollarının, eləcə də layihələrin hazırlanmasını təşviq etmək olub.