“Qarabağ Universitetini seçdim, doğma Qarabağımızın  gündən-günə çiçəklənməsini arzulayıram”

Əli Məmmədzadə Qarabağ Universitetinin tələbəsi, Bakının Kürdəxanı qəsəbəsindəki 113 nömrəli tam orta məktəbin məzunudur.  O, söhbətə belə başladı: “Tarix ən çox  sevdiyim fənn idi. Fizikanı mənimsədikcə daha çox sevdim və X sinifdə oxuyanda ali məktəbə qəbul imtahanlarına III deyil, II ixtisas qrupu üzrə qatılmağa qərar verdim. İnformatikanı da sevdiyim üçün texnologiya sahəsinə yönəldim. İnformatika, fizika ilə daha dərindən məşğul olaraq kompüter mühəndisliyinə hazırlaşdım”. İxtisas qrupları arasında keçidə səbəb nə olub, görəsən? Ə.Məmmədzadənin sözlərinə görə, fizikanı sosial şəbəkələrdə sevib: “Sosial şəbəkələri izləyir, bəzi akademiklərin öz səhifələrində paylaşdıqları eksperimentlərə maraq göstərirdim. Bu da məndə böyük maraq oyatdı. Yavaş-yavaş bu fənnə marağım artdı. Hiss etdim ki, fizikanı daha çox oxuyuram”.

Mənim müəllimim

Əli Məmmədzadənin hekayəsində maraqlı bir məqam var. Onun fənlərə olan sevgisi ilə sevdiyi müəllim fərqlənir. “Ömrümün sonunadək həyatıma təsir edən müəllim kimi unutmayacağım yeganə insan Azərbaycan dili və ədəbiyyat fənnindən dərs deyən Gülnar Fərəcovadır. Hazırda sahib olduğum hər şeyə, hətta həyatda bir hədəfim, məqsədli fəaliyyətim, öz düşüncələrimin olması belə Gülnar müəllimdən qaynaqlanır. Tarixdən fizikaya yönələndə də, ixtisasımı seçəndə də Gülnar müəllimimlə məsləhətləşdim. Hətta Bakı şəhəri təhsil işçilərinin sentyabrkonfransında Qarabağ Universitetinin tələbəsi kimi mənə söz verilmişdi. Burada edəcəyim çıxışın mətnini Gülnar müəllimə də göstərdim”.

Əli Məmmədzadənin fikrincə,  müəlliminin onun üzərində  təsiri çox böyükdür: “Gülnar müəllim formalaşdırıb mənim fikirlərimi, dünyagörüşümü. Oxuduğum kitabları onun tövsiyəsi ilə seçmişəm. Əgər bu təsiri nəzərə alsaq, məktəbin rolunun nisbətən böyük olduğunu deyə bilərəm. Amma məktəblə yanaşı, ailə, əhatə dairəsi də çox önəmlidir”.

Sosial layihələrdə

“Gülnar müəllim və direktorumuz Gültəkin müəllim məktəbimizin bir sıra təşəbbüslərinin gerçəkləşdirilməsinə məni də cəlb etdilər”, - deyən gənc tələbə bu məsuliyyətin öhdəsindən uğurla gəlib: “Bacardığım qədər məktəbimizin layihələrində fəallıq göstərdim. Tamaşalar yazıb, kiçik filmlər çəkdik. Tamaşalarımıza, filmlərimizə hekayələri özümüz yazır, ssenarisini qurur, özümüz də çəkirdik.  Qadın hüquqları ilə bağlı hazırladığımız film “YouTube”da  100 minə yaxın izləndi. Bu filmdən sonra bizə öz taleyi haqqında yazan xanımlar oldu. Geri dönüş edib təşəkkür edənlər belə vardı. Çox layihələr hazırlamışdıq, amma həmin layihə geri dönüş aldığımız ilk layihə oldu”.  

“Universitetin ən çox tələbəyönümlü siyasətini bəyəndim”

Humanitar fənlərə maraq göstərib, tarixi sevib, fizikanı seçib, kompüter mühəndisi olmağa qərar verib.

İxtisasına qərar verəndən sonra sıra bu ixtisasa harada yiyələnəcəyini müəyyənləşdirməyə gəlib: “Qarabağ Universiteti ilə bağlı məlumatlar diqqətimi çəkdi.  Araşdırdım və bu universiteti seçməyə qərar verdim. Universitetin ən çox tələbəyönümlü siyasətini bəyəndim. Yüksək səviyyəli müəllim heyəti,  keyfiyyətli təhsil olacağına dair təsəvvür yarandı”.

Əli deyir bütün uşaqlığı boyu Qarabağ adı hər zaman nisgil dolu  hisslərlə anılıb. Qarabağ torpaqlarında işğal, qan, haqsızlıq, zülm barədə oxuyan, Vətən müharibəsi dövrünü, böyük Zəfəri yaşayan bir məktəblinin başqa seçimi ola bilərdimi? O da ürəyində baş qaldıran hisslərə təslim olub və seçimini edib: “Qarabağ Universitetini seçdim, çünki doğma Qarabağımızın gündən-günə çiçəklənməsini arzulayıram”.  

“Qarabağı görmək, burada yaşamaq uşaqlığımın böyük bir hissəsinin ən böyük xəyalı idi. Bu, Qarabağ Universitetində oxumaq üçün bir səbəbdir. Eyni zamanda Qarabağda rahat təhsil ala biləcəyimiz mühit var”, - deyən Ə.Məmmədzadə məktəbli ikən işğal tarixini əzbərlədiyi torpaqlarda gəncliyinin ən gözəl çağlarını - tələbəliyini yaşayır.  

“Ən böyük hədəfim Azərbaycanımıza töhfə verməkdir”, - deyir Əli Məmmədzadə: “Elm sahəsi, sosial layihələr ola bilər. Əlimdən nə gəlirsə, ölkəm üçün etməyə hazıram”.