Binəqədi rayonu R.Əliyev adına 3 nömrəli tam orta məktəbin IX, X və XI sinif şagirdlərinin iştirakı ilə “Narkomaniya və ağ ölüm” mövzusuna həsr olunmuş növbəti tədbir keçirilib.

Məktəbin direktoru, Əməkdar müəllim Almaz Həsrət “Narkomaniya və ağ ölüm” mövzusunun məqsəd və əhəmiyyətindən danışaraq tədbirin təşkilatçılarına və qonaqlara rəhbərlik etdiyi kollektiv adından minnətdarlığını bildirib. Narkomaniyaya qarşı mübarizənin sağlam həyatın təminatı olduğunu, zərərli vərdişlərlə mübarizədə bu cür maarifləndirici görüşlərin əhəmiyyətini vurğulayaraq şagirdləri sağlam həyat tərzi keçirməyə çağırıb.

Tədbirdə Binəqədi Rayon Polis idarəsinin rəisi polis polkovniki İlqar Məmmədov, Binəqədi Rayon İcra Hakimiyyətinin müavini Sevinc Süleymanova, Binəqədi rayonunun 5-ci Polis bölməsinin rəisi polis polkovnik- leytenant Tuncay Abbasov, Binəqədi rayon Polis İdarəsinin ictimai təhlükəsizlik şöbəsinin rəisi İsa Həbibzadə, Binəqədi rayon Polis İdarəsinin Narkotiklərlə Mübarizə bölməsinin rəisi polis baş leytenantı Fərrux Həsənov, polis bölməsinin digər əməkdaşları, müəllim və şagirdlər iştirak ediblər.

Tədbirdə narkomaniya, onun törətdiyi fəsadlar və bununla bağlı ölkəmizdə aparılan mübarizə tədbirləri barədə şagirdlərə geniş məlumat verilib.

Narkomaniya cinayətkarlığa, zorakılığa yol açan, hazırda ciddi qlobal problemə çevrilən, narkotik vasitələrdən istifadə edən şəxslərin özlərini uğurlu gələcəkdən məhrum edən pis vərdiş olduğunu vurğulayan polis polkovniki İlqar Məmmədov narkomaniyaya qarşı mübarizənin gücləndirilməsi və onun yayılmasının qarşısının alınmasından danışıb. O, "Ağ ölüm”ün ailə və cəmiyyət üçün yaratdığı problemləri diqqətə çatdıraraq, narkotiklərin qanunsuz dövriyyəsinin və narkomanlığın bu gün dünyanı narahat edən qlobal problemlərdən biri olduğunu, bu problemin insan cəmiyyətinin mənəvi və əxlaqi dəyərlərinə böyük zərbə vurduğunu, sosial-iqtisadi inkişafa mənfi təsir göstərdiyini, insanların həyat və sağlamlığına ciddi təhlükə yaratdığını, cinayətkarlığın artmasına səbəb olduğunu bildirib. Polis polkovniki İlqar Məmmədov narkomaniya ilə mübarizənin sağlam cəmiyyətin formalaşması baxımından qarşıda duran əsas vəzifələrdən biri olduğunu, ümumtəhsil məktəblərində keçirilən silsilə maarifləndirici tədbirlərin məktəblilərin zərərli vərdişlərdən uzaq durmalarında böyük əhəmiyyət daşıdığını qeyd edib. Ölkə Prezidenti İlham Əliyev, Birinci vitse-prezident Mehriban Əliyeva tərəfindən bu sahədə görülmüş işlərdən, həyata keçirilən layihələrdən, qəbul edilən dövlət proqramlarından söz açan polis polkovniki İlqar Məmmədov mübarizə tədbirlərinin bu gün də davam etdirildiyini söyləyib. Ölkə Prezidentinin 2019-cu il 22 iyul tarixli 1334 nömrəli Sərəncamı ilə təsdiq edilmiş "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nın da məhz bu məqsədə xidmət etdiyini söyləyib. Çıxışının yekununda polis polkovniki İlqar Məmmədov ölkəmizdə narkotik vasitələrin və narkomanlığın yayılmasının qarşısını almaq məqsədilə aidiyyəti təşkilatlarla və vətəndaşlarla operativ qaydada əlaqələndirməni təmin edən "802” çağrı xidmətinin fəaliyyət göstərdiyini şagird və müəllim heyətinin diqqətinə çatdırıb.

Binəqədi Rayon İcra Hakimiyyətinin müavini Sevinc Süleymanova bəşəriyyətin ən ağrılı problemlərindən olan, cəmiyyətin ciddi bəlasına, xalqın, millətin təhlükə mənbəyinə çevrilən narkomaniyanı, ağ ölümə qarşı mübarizə aparmağın vacibliyini qeyd edib. Yaşadığımız müasir dövrdə bəşəriyyəti təhdid edən narkotik asılılığının cəmiyyətdə və insan həyatında törədə biləcəyi neqativ hallardan danışıb.

Sonda Binəqədi Rayon Polis idarəsinin rəisi polis polkovniki İlqar Məmmədov tərəfindən mövzu ilə bağlı məktəbliləri maraqlandıran suallar cavablandırılıb, narkomaniya ilə mübarizəyə həsr olunmuş videoçarx nümayiş etdirilib.