Elm və Təhsil Nazirliyinin təşəbbüsü və Təhsilin İnkişafı Fondunun dəstəyi ilə həyata keçirilən “Maarifçi” tələbə-məzun təcrübə proqramı çərçivəsində Azərbaycan Dillər Universitetində (ADU) maarifləndirici tədbir keçirilib.

Universitetdən “Azərbaycan müəllimi”nə bildirilib ki, tədbirin əsas məqsədi proqram haqqında ətraflı məlumat vermək və tələbələri bu təşəbbüsə qoşulmağa həvəsləndirmək olub. Görüşdə magistrantlar və IV kurs bakalavr tələbələri fəal iştirak ediblər.

Tədbirdə ADU-nun Magistratura şöbəsinin müdiri Firuzə Rzayeva, Tədris məsələləri üzrə prorektor Şəfəq Şahməmmədova, həmçinin Elm və Təhsil Nazirliyinin nümayəndələri Tünzalə Vəliyeva və Səma Əliyeva iştirak ediblər. Nazirlik təmsilçiləri proqramın məqsədi, strukturu və iştirak şərtləri barədə slayd təqdimatı ilə geniş məlumat veriblər.

Görüş zamanı tələbələrin çoxsaylı sualları cavablandırılıb. Bildirilib ki, “Maarifçi” proqramı tələbə və məzunların bilik və bacarıqlarını inkişaf etdirməyə, onları müasir təhsil yanaşmaları ilə tanış etməyə yönəlib. Proqram il ərzində iki dəfə, hər biri 4 ay olmaqla təşkil olunur.

Təcrübə proqramına bakalavriatın IV kurs tələbələri, magistrantlar, eləcə də son 3 il ərzində məzun olmuş şəxslər müraciət edə bilərlər. İştirakçılar Elm və Təhsil Nazirliyinin müxtəlif struktur bölmələrində və tabeliyində olan qurumlarda təcrübə keçmək imkanı əldə edirlər. Təcrübə müddətində tələbələr yarım, məzunlar isə tam iş günü sistemi ilə çalışırlar. Onlara gündəlik yol və qida xərclərini qarşılamaq üçün aylıq qonorar təqdim olunur.

Seçim prosesi ərizə, yazılı imtahan və müsahibə mərhələlərindən ibarətdir. Proqramı uğurla başa vuran iştirakçılara rəsmi sertifikat verilir.

Tədbirdə tələbələrin gələcək karyera planlamasında mühüm rol oynayacaq faydalı məlumatlar verilib.