Sentyabrın 23-də Xankəndi şəhərində yerləşən Qarabağ Universitetində Azərbaycan Respublikasının Elm və Təhsil Nazirliyi və Türkiyə Respublikasının Milli Təhsil Nazirliyi arasında ikitərəfli görüş keçirilib.

“Azərbaycan müəllimi” xəbər verir ki, görüşdə Azərbaycan Respublikasının elm və təhsil naziri Emin Əmrullayev, Türkiyə Respublikasının milli təhsil naziri Yusuf Tekinin rəhbərlik etdiyi nümayəndə heyəti, Azərbaycanın Ankaradakı səfirliyinin təhsil məsələləri üzrə müşaviri Nəcibə Nəsibova, Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhrəmanov və Qarabağ Universitetinin rektoru Şahin Bayramov iştirak ediblər.

Mərasim zamanı “Azərbaycan Respublikası Hökuməti ilə Türkiyə Respublikası Hökuməti arasında təhsil sahəsində əməkdaşlıq haqqında 2017-ci il 31 oktyabr tarixli Sazişə Əlavə Protokol” və “Azərbaycan Respublikası Hökuməti ilə Türkiyə Respublikası Hökuməti arasında peşə təhsili sahəsində əməkdaşlığa dair 2021-ci il 19 fevral tarixli Protokola Əlavə Protokol” imzalanaraq qüvvəyə minib.

Hər iki sənəd iki qardaş ölkə arasında təhsil əməkdaşlığını yeni keyfiyyət mərhələsinə daşımaqla, ortaq layihələrin icrası, müəllim-tələbə mübadiləsi, kurikulumların uyğunlaşdırılması və peşə təhsili sahəsində birgə təşəbbüsləri əhatə edir.

Mərasimdə çıxış edən elm və təhsil naziri Emin Əmrullayev bildirib ki, Azərbaycan və Türkiyə arasında dostluq və qardaşlıq münasibətləri təhsil sahəsində də möhkəm təmələ əsaslandır. Nazir imzalanan sənədlərin birgə gələcəyimizi daha da möhkəmləndirərək iki ölkənin təhsil sistemlərinin daha sıx inteqrasiyasına xidmət edəcəyini diqqətə çatdırıb.

Türkiyənin milli təhsil naziri Yusuf Tekin çıxışında Azərbaycanla təhsil sahəsində əməkdaşlığın Türkiyə üçün prioritet olduğunu qeyd edib. Y.Tekin əlavə edib ki, tərəflər bu əməkdaşlığı yalnız rəsmi sənədlərlə deyil, konkret fəaliyyət və layihələrlə də gücləndirmək niyyətindədir.

Qeyd edək ki, görüş çərçivəsində nümayəndə heyəti Qarabağ Universitetinin fəaliyyəti ilə yaxından tanış olub. Universitetdə aparılan bərpa və quruculuq işləri, yaradılan təhsil imkanları və tədris prosesi nümayəndələrin xüsusi marağına səbəb olub.