2025-ci il 8–10 aprel tarixlərində Türkiyənin İstanbul şəhərində Avrasiya Universitetlər Assosiasiyasının (EURAS) təşkilatçılığı ilə “EURIE 2025 – Avrasiya Ali Təhsil Zirvəsi” baş tutub. Sayca 10-cu dəfə keçirilən bu beynəlxalq tədbir ali təhsilin beynəlmiləlləşdirilməsi, strateji tərəfdaşlıqların qurulması və qarşılıqlı təcrübə mübadiləsinin təşviqi baxımından əhəmiyyətli platforma kimi qiymətləndirilib.

Universitetdən “Azərbaycan müəllimi”nə bildirilib ki, İstanbulun Lütfi Kırdar Beynəlxalq Konqres və Sərgi Mərkəzində təşkil olunan Zirvə 65 ölkədən 2000-dən artıq iştirakçını – ali təhsil rəhbərlərini, akademikləri, beynəlxalq təşkilat nümayəndələrini və sənaye təmsilçilərini bir araya gətirib. Tədbir çərçivəsində 150-dən çox ali təhsil müəssisəsinin stendi nümayiş etdirilib, 60-dan artıq panel müzakirəsi və 150 beynəlxalq ekspertin iştirakı ilə paralel sessiyalar həyata keçirilib. Sessiyalarda ali təhsildə beynəlmiləlləşmə trendləri, tələbə və müəllim mobilliyi, Erasmus+ proqramı, rəqəmsal transformasiya, keyfiyyət təminatı və davamlı akademik əməkdaşlıq kimi mövzular ətrafında geniş fikir mübadiləsi aparılıb.

Azərbaycan Memarlıq və İnşaat Universiteti (AzMİU) bu nüfuzlu beynəlxalq tədbirdə İctimaiyyətlə əlaqələr və marketinq mərkəzinin direktoru İsa Muradov və Xarici əlaqələr şöbəsinin Ortaq təhsil proqramlarının idarə olunması sektorunun müdiri Könül Şirinova tərəfindən təmsil olunub. Nümayəndələr universitetin beynəlxalq əlaqələrinin inkişafı, xarici tərəfdaşlarla əməkdaşlığın gücləndirilməsi və beynəlmiləlləşmə strategiyasının təqdimatı istiqamətində fəallıq nümayiş etdiriblər.

Zirvə çərçivəsində AzMİU nümayəndələri Koç, Boğaziçi, Orta Doğu Texniki Universiteti, İstanbul Texniki Universiteti kimi Türkiyənin aparıcı ali təhsil ocaqları ilə yanaşı, Malayziya, Kanada, Polşa və Rumıniyadan olan universitetlərin və xaricdə təhsil şirkətlərin nümayəndələri ilə bir sıra görüşlər keçirilib. Görüşlər çərçivəsində əcnəbi tələbələrin AzMİU-ya cəlb olunması, tələbə və akademik mobilliyi, birgə tədqiqat layihələri və qarşılıqlı əməkdaşlıq imkanları məsələsi əsas prioritet istiqamət kimi diqqət mərkəzində olub. 

Tədbir çərçivəsində təşkil edilən sərgi zonasında AzMİU-nun stendi də təqdim olunub. Stend vasitəsilə universitetin tədris proqramları, tədqiqat istiqamətləri, mövcud beynəlxalq əməkdaşlıqları və gələcək tərəfdaşlıq imkanları barədə ətraflı məlumatlar təqdim edilib. Ziyarətçilərə tanıtım broşürləri və digər çap materialları paylanılıb. Stendə müxtəlif ölkələrin universitet rəhbərləri, beynəlxalq təşkilatların nümayəndələri və xarici tələbələr maraq göstəriblər.

Qeyd edilməlidir ki, AzMİU beynəlxalq əlaqələrin genişləndirilməsini, akademik mobilliyin stimullaşdırılmasını və tələbələr üçün qlobal təhsil imkanlarının yaradılmasını əsas strateji hədəflərindən biri kimi müəyyənləşdirib. Bu kontekstdə “EURIE 2025 – Avrasiya Ali Təhsil Zirvəsi”ndə iştirak, AzMİU-nun Avrasiya regionunda çoxşaxəli inkişaf edən və beynəlxalq əməkdaşlıqlara açıq ali təhsil müəssisəsi kimi mövqeyini bir daha təsdiqləyib.