Bakı Şəhəri üzrə Təhsil İdarəsinin (BŞTİ) tabeliyindəki təhsil müəssisələrində ümummilli lider Heydər Əliyevin anadan olmasının 102-ci ildönümü ilə əlaqədar tədbirlər təşkil olunub.

“Azərbaycan müəllimi” xəbər verir ki, tədbirlərdə ulu öndər Heydər Əliyevin Azərbaycana rəhbərlik etdiyi hər iki dövrdə dövləti və xalqı qarşısında göstərdiyi tarixi xidmətlər, ölkənin rifahi naminə gördüyü misilsiz işlər barədə şagirdlərə ətraflı məlumat verilib. Bildirilib ki, Azərbaycanın müasir tarixinin ən parlaq səhifələrini əhatə edən dövr məhz Heydər Əliyevin adı ilə bağlıdır. Bu dövrdə Azərbaycan Heydər Əliyevin rəhbərliyi altında böyük və sürətli inkişaf yolu keçib.

Bütün fəaliyyəti dövründə elmin, təhsilin inkişafına xüsusi qayğı ilə yanaşan Heydər Əliyevin tərəqqinin yeganə yolunu xalqın maariflənməsində gördüyü şagirdlərin diqqətinə çatdırılıb. Vurğulanıb ki, bu gün Azərbaycanın əldə etdiyi nailiyyətlər məhz Heydər Əliyevin müəyyənləşdirdiyi uğurlu siyasi xəttin bəhrələridir. Qeyd olunub ki, Ümummilli Liderin ideyalarını həyata keçirən Prezident İlham Əliyevin rəhbərliyi ilə Azərbaycan dünya birliyində xüsusi yeri olan, ərazi bütövlüyünü və suverenliyini tam bərpa etmiş nüfuzlu ölkə kimi tanınır.

Tədbirlərdə Ulu Öndərin keçdiyi zəngin həyat yolundan bəhs edən videoçarxlar təqdim olunub. Həmçinin məktəblilər onlara ərmağan edilən müasir, müstəqil Azərbaycanın memarına ehtiram əlaməti olaraq şeirlər, mahnılar, ədəbi-bədii kompozisiyalarla çıxış ediblər.

Təhsilalanların və məktəb kollektivlərinin Heydər Əliyevin anadan olmasının 102-ci ildönümü ilə bağlı Fəxri xiyabana ziyarətləri də təşkil olunub.