Qəbələ Dövlət Peşə Təhsil Mərkəzində “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində təşkil olunan təlimləri uğurla başa vuran növbəti müdavimlərə sertifikatlar təqdim edilib.

“Azərbaycan müəllimi” xəbər verir ki, qısamüddətli kurslar keçmiş məcburi köçkünlər üçün “Arıçılıq” və “Rəqəmsal media və marketinq mütəxəssisi” ixtisasları üzrə keçirilib. Bu kursları bitirən və buraxılış-ixtisas imtahanından müvəffəqiyyətlə keçən müdavimlər Elm və Təhsil Nazirliyi tərəfindən təsdiqlənmiş dövlət nümunəli sertifikatlarla təltif olunublar.

Tədbirdə Qəbələ Rayon İcra Hakimiyyəti başçısının müavini Ətayə Osmanova, Şəki-Zaqatala Regional Təhsil İdarəsinin Qəbələ rayon sektorunun müdiri Arifə Bayramova, Şəki-Zaqatala Regional Məşğulluq filialının Qəbələ rayon şöbəsinin müdiri Ramil İsayev iştirak ediblər.

Direktor Qalib Nəbiyev çıxış edərək “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində Qəbələ Dövlət Peşə Təhsil Mərkəzində təşkil edilən qısamüddətli təlimlərdən danışıb: “Cari ildə Qəbələ Dövlət Peşə Təhsil Mərkəzində 40 nəfər məcburi köçkün kurslara cəlb olunub. 2024-cü ildə isə mərkəzdə 84 nəfər bu təlimlərdə iştirak edib. Ümumilikdə 124 nəfər məcburi köçkün müxtəlif peşələr üzrə yeni bilik və bacarıqlara yiyələnib”.

O qeyd edib ki, qısamüddətli təlimlər seçilmiş ixtisasdan asılı olaraq 1 aydan 3 ayadək davam edir. Təlimlərin əsas məqsədi proqram çərçivəsində işğaldan azad edilmiş ərazilərə qayıdan vətəndaşların əmək bazarında rəqabətqabiliyyətini artırmaq, onların peşə vərdişlərini inkişaf etdirmək və davamlı məşğulluğunu təmin etməkdir.

Tədbirdə “Böyük Qayıdış” proqramı çərçivəsində işğaldan azad olunmuş ərazilərə qayıdacaq əhalinin məşğulluq imkanlarının artırılması və sosial müdafiəsinin təmin edilməsində peşə təhsilinin mühüm rolunun olduğu vurğulanıb.

Qeyd edək ki, təlimlərdə 14 nəfər “Rəqəmsal media və marketinq mütəxəssisi”, 9 nəfər isə “Arıçılıq” ixtisası üzrə iştirak edib. Ümumilikdə 23 müdavim sertifikatla təmin olunub.

Xatırladaq ki, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində qısamüddətli peşə təlimləri ölkənin 10 peşə təhsil müəssisəsində 42 ixtisas üzrə həyata keçirilir. Proqram üzrə 2024-cü ildə 215 nəfər, 2025-ci ildə isə artıq 653 nəfər müxtəlif sahələr üzrə təlimlərə cəlb olunub. Təlimlərdə iştirak etmək istəyən məcburi köçkünlər portal.edu.az platforması vasitəsilə qeydiyyatdan keçə bilirlər.

Ölkədə dual təhsil sisteminin ilk tətbiq olunduğu Qəbələ Dövlət Peşə Təhsil Mərkəzində keçirilən tədbir çərçivəsində “Açıq Qapı” günü də təşkil olunub.