İyunun 18-dən başlayan müəllimlərin sertifikatlaşdırılma imtahanlarının təşkil olunduğu məkanlardan biri də Sumqayıt şəhəri 1 nömrəli tam orta məktəbdir. 

“Azərbaycan müəllimi” dünən həmin mərkəzdə imtahanın gedişini yerində izləyib, müəllimlərlə həmsöhbət olub.

Abşeron-Xızı Regional Təhsil İdarəsinin sertifikatlaşdırma üzrə məsul əməkdaşı Nuranə Əlizadənin “Azərbaycan müəllimi”nə verdiyi məlumata görə, dünənki imtahanda Abşeron-Xızı regionu üzrə 156 təhsilverən sertifikasiya prosesinə cəlb olunub: "İmtahanda ilk dəfə sertifikatlaşdırmaya qatılan namizədlər iştirak ediblər. Burada, əsasən, Abşeron-Xızı və Şərqi Zəngəzur Təhsil idarələrinin tabeliyindəki  ümumtəhsil müəssisələrinin müəllimləri imtahan veriblər. Mart ayından artıq biz müəllimləri qeydiyyata salmağa başlamışıq. Ümumilikdə Abşeron-Xızı regionu üzrə iyunun 25-nə qədər 1339 təhsilverənin sertifikatlaşdırma imtahanında iştirakı nəzərdə tutulur". 

Saat 11-in olmasını gözləyirik. Müəllimlər bir-bir yerlərində əyləşirlər. İmtahan başlayır. Qarşısında 60 sual, ürəyində imtahan həyəcanı olan 156 müəllim diqqətini önündəki kompüterlərə yönəldir.

Saat yarımdan sonra tək-tək imtahan zalından çıxan müəllimlərə yaxınlaşırıq.

Simalarında sevinc və təbəssüm olan müəllimlər çox həyəcanlıdırlar.

Xoşbəxtlik hissi ilə 58 bal topladığını qeyd edən Zeynəb Əliyeva Masazır qəsəbə 6 nömrəli tam orta məktəbin riyaziyyat müəllimidir. Daha əvvəl Naxçıvan Muxtar Respublikasında işlədiyini və 12 illik pedaqoji staja malik olduğunu bildirən müəllim MİQ imtahanında 82,5 bal yığaraq hazırda işlədiyi məktəbə işə qəbul edilib.  Zeynəb müəllim sualların onun üçün çətin olmadığını, kurikulum bölməsində  müəllimlərin uşaqlarla gündəlik rəftarına aid sualların yer aldığını deyir. 

Elvin Şərbətov 14 ildir ki, Abşeron rayonu Səxavət Məmmədov adına Digah qəsəbə tam orta məktəbində fəaliyyət göstərdiyini bildirir. Sertifikasiya imtahanında  54 bal toplayan müəllim kurikuluma dair bəzi sualların cavablandırılmasında çətinlik çəkdiyini qeyd edir: "Müxtəlif vəsaitlərdən istifadə edərək sertifikatlaşdırma imtahanına hazırlaşmışam. İxtisasa aid suallar tam orta məktəb səviyyəsində idi. Məncə, həyəcan olmasa, hər bir şey uğurlu olar".

57 bal topladığını deyən Lamiyə Əkbərova 4 ildir ki, Sumqayıt şəhəri 19 nömrəli tam orta məktəbdə ingilis dili müəllimi işləyir. Qeyd edir ki, sertifikasiya imtahanına yanvar ayından hazırlaşır:  "Çox sevincliyəm, yüksək nəticə göstərəcəyimi gözləyirdim. İxtisas sualları bir az çətin idi. Müəllimlərə tövsiyəm odur ki, çox güclü hazırlasınlar, çünki suallar çətin ola bilər".

Rüfət Qazi 50 bal topladığını və sağlamlıq imkanları məhdud uşaqlar üçün 3 nömrəli Respublika xüsusi internat məktəbində riyaziyyat müəllimi işlədiyini söyləyir. MİQ yolu ilə bu məktəbə işə qəbul olunan müəllim imtahana hazırlıq prosesində məktəb proqramı ilə kifayətlənmədiyini, əlavə tapşırıqlar işlədiyini bildirir: "İmtahanda suallar məktəb proqramı əhatəsində olsa da, daha məntiqli idi. Yaxşı nəticə əldə etmək üçün daha çox çalışmaq, öz üzərində işləmək lazımdır".