Gəncə şəhəri Mir Cəlal Paşayev adına 39 nömrəli tam orta məktəbin məzunu Şəmsinur Məmmədzadə böyük uğura imza atıb. O, Birləşmiş Dünya Kollecləri (United World Colleges – UWC) Milli Komitəsi tərəfindən keçirilən çoxmərhələli seçim prosesini uğurla keçərək  2025–2027-ci illərdə Kanadanın nüfuzlu “Pearson College UWC” məktəbində tam təqaüdlə təhsil almaq hüququ qazanıb. 

“Azərbaycan müəllimi” uğurlu gənclə həmsöhbət olub. 

Böyük uğurlar böyük xəyallarla başlayır

Şəmsinur uğurunun arxasında dayanan səbəbləri belə izah edir: “Uşaq vaxtından bacım kimi xaricdə ölkəmizi təmsil etmək istəyirdim. Özümü inkişaf etdirmək məni həmişə ruhlandırıb”.

Şəmsinur üçün seçim prosesində ən çətin mərhələ videomüsahibə olub: “Mənə görə, ən çətin mərhələ videomərhələ idi. Çünki müəyyən mövzu haqqında yalnız 1–2 dəqiqə danışmaq mümkün idi. Fikirləri bu qədər qısa vaxtda tam çatdırmaq heç də asan deyildi”.

Onun fikrincə, seçimdə əsas rol oynayan məhz şəxsi keyfiyyətləri olub: “Ən çox uyğunlaşma bacarığım, mədəniyyətlərarası marağım və öyrənməyə açıqlığım seçilməyimdə həlledici oldu”.

Proqram haqqında ilk dəfə yaxın qohumundan eşidən Şəmsinur indi həmin günün həyatında dönüş nöqtəsi olduğunu deyir: “İlk dəfə bu məlumatı yaxın bir qohumumdan almışdım. O vaxtdan proqram diqqətimi çəkmişdi və hədəfimə çevrilmişdi”.

Şəmsinur uğur yolunda tək olmadığını xüsusi vurğulayır: “Bu yolda mənə dəstək olan ailəmə, dostlarıma, qohumlarıma, xüsusilə bacıma çox minnətdaram”. 

Sadə və böyük arzunun izi ilə…

Kanadada təhsil almaq Şəmsinur üçün sadəcə akademik biliklər deyil, həm də böyük bir həyat təcrübəsi deməkdir. O, gələcəkdə beynəlxalq münasibətlər üzrə təhsil almaq istədiyini deyir: “Müxtəlif mədəniyyətlərdən öyrənməyi sevirəm, fərqli baxışlara hörmət edir və insanları birləşdirən dəyərlərə inanıram. Bu məni UWC dəyərlərinə daha da yaxınlaşdırır”.

Şəmsinur uğurunun təkcə özünə aid olmadığını düşünür: “Mənim uğurum Gəncədə oxuyan digər şagirdlərə göstərir ki, məqsəd qoyduqda və çalışdıqda imkanlar hamı üçün açıqdır”.

O, yaşıdlarına da səmimi məsləhətlərini çatdırır: “Onlara məsləhətim odur ki, özlərinə güvənsin, fürsətlərdən qorxmasın və daim öyrənməyə açıq olsunlar”.
Ən yaxın arzusu sadə olduğu qədər həm də böyükdür: “Arzum yaxşı təhsil alaraq cəmiyyətə faydalı insan olmaqdır. Bu uğur həmin arzuma bir addım yaxınlaşdığımı göstərir”.