“Azərbaycan müəllimi” xəbər verir ki, 2025/2026-cı tədris ilində ümumtəhsil müəssisələrinin 6-cı siniflərində tətbiq ediləcək yeni nəsil “Riyaziyyat” dərslik komplektinin məzmunu və tədris texnologiyasının xüsusiyyətlərinə həsr olunmuş vebinar keçirilib.

Vebinarda çıxış edən Tədris Resursları Mərkəzinin direktoru, dərsliyin müəllifi və layihə rəhbəri Zaur İsayev bildirib ki, “Riyaziyyat” dərsliklərini hazırlayarkən həm müsbət təcrübələr, həm də müəyyən çətinliklər müşahidə olunur:

“Ənənəvi sovet təhsil sistemi ilə müasir dünya reallıqlarına uyğun təhsil arasında inteqrasiyada müəyyən boşluqlar mövcuddur. Bu, ən böyük problemlərdən biridir. Çünki bizim müəllimlər hələ də müəyyən qədər sovet dövrünün təhsil ənənələri ilə işləyirlər. Təbii ki, bu, inkar ediləsi bir sistem deyil. Sovet təhsil modeli dünyanın elm və təhsil tarixində özünəməxsus yer tutub. Lakin bu gün müasir tələblərə uyğunlaşma, yeni yanaşmaların tətbiqi zərurəti yaranıb”.

Zaur İsayevin sözlərinə görə, bu gün valideynlərin və şagirdlərin gözləntiləri də dəyişib. Dünyanın aparıcı ölkələrinin ali məktəblərinə qəbul olmaq istəyən məzunların müasir yanaşmalarla riyaziyyatı öyrənməsi vacibdir. Yeni dərslik də məhz bu məqsədə xidmət edir:

“Bizim vəzifəmiz şagirdlərə yalnız nəzəri bilikləri deyil, həm də praktik düşünmə bacarıqlarını aşılamaqdır. Çünki müasir təhsil sistemində riyaziyyat yalnız hesablamalar deyil, həm də məntiqi təfəkkürün inkişafı vasitəsidir”.