“Müəssisələrin publik-hüquqi şəxs statusunda yaradılması alternativ maliyyə mexanizmlərinin əldə edilməsinə və elmi resurslardan daha səmərəli işlənməsinə əsas verəcək”.

“Azərbaycan müəllimi” xəbər verir ki, bunu Milli Məclisin deputatı Mehriban Vəliyeva Prezident İlham Əliyevin Elm və Təhsil Nazirliyinin tabeliyindəki elmi müəssisələrin fəaliyyətinin optimallaşdırılması və səmərəliliyinin artırılması ilə bağlı əlavə tədbirlər haqqında imzaladığı Sərəncamla bağlı danışarkən deyib. 

O bildirib ki, Sərəncama əsasən, nazirliyin tabeliyində olan yaxın istiqamətlər üzrə fəaliyyət göstərən bir sıra elmi-tədqiqat institutlarının struktur baxımından optimallaşdırılması nəzərdə tutulur: “Elmi müəssisələrin fəaliyyətinin optimallaşdırılması istiqamətində “Azərbaycan Respublikası Elm və Təhsil Nazirliyinin tabeliyindəki elmi müəssisələrin fəaliyyətinin optimallaşdırılması və səmərəliliyinin artırılması ilə bağlı əlavə tədbirlər haqqında” Prezident Sərəncamı imzalanıb və nəticədə Elm və Təhsil Nazirliyinin tabeliyindəki bir sıra elmi institutlar birləşdiriləcək və onların əsasında yeni ixtisaslaşmış 8 İnstitut yaradılacaq. Fəaliyyət effektivliyi zəif olan bəzi elmi-istehsalat birliklərinin fəaliyyətinə xitam veriləcək. ”Nafta”, “Aşqar” və “Kompozit” Elmi İstehsalat birliklərinin fəaliyyəti dayandırılacaq”.

Millət vəkili vurğulayıb ki, Polimer Materialları İnstitutunu Sumqayıt Dövlət Universitetinə, Gəncədə yerləşən dörd institut Gəncə Dövlət Universitetinə, Naxçıvanda yerləşən üç müəssisə isə Naxçıvan Dövlət Universitetinə veriləcək: 

“Bu isə elm və təhsilin inteqrasiyasını daha da sürətləndirəcək. Həmçinin beynəlxalq standartlara uyğun iki yeni elmi müəssisənin yaradılması da planlaşdırılır. Təbii ki, elmi idarəetmədə yeni müstəvi açacaq islahat yönümlü dəyişikliklər elm sahəsində ixtisaslaşmanın güclənməsinə, müasir elmi-tədqiqat mühitinin formalaşmasına və resursların daha da məqsədyönlü idarə olunmasına, dövlət büdcəsindən səmərəli istifadə edilməsinə imkan verəcək”.

O qeyd edib ki, Sərəncamdan irəli gələn tədbirlər institutlararası əməkdaşlığa, elmi-tədqiqat sahələrinin müasirləşməsinə, elmi yaradıcılıq üçün şəraitin yaradılmasına, effektivliyin artırılmasına, alim əməyinin daha da yüksək qiymətləndirilməsinə, gənc alimlərin dəstəklənməsinə, beynəlxalq elmi əməkdaşlığın genişləndirilməsinə imkan yaradacaq: “Elm sahəsində islahat elm və təhsil sahəsi ilə yanaşı, elm və istehsalat sahəsində də inteqrasıyanı, bərabər effektiv fəaliyyəti və idarəetməni gücləndirəcək. Sərəncamda nəzərdə tutulan tədbirlərin icrası 2025-ci ilin sonunadək mərhələli şəkildə həyata keçiriləcək”.