Naxçıvan Dövlət Universitetində (NDU) Naxçıvan Muxtar Respublikasının elm və ali təhsil ictimaiyyətinə açıq infosessiya keçirilib.

Universitetdən “Azərbaycan müəllimi”nə bildirilib ki, tədbir Elm və Ali Təhsil üzrə Dövlət Agentliyinin təşkilatçılığı, NDU-nun əməkdaşlığı ilə reallaşıb. İnfosessiyada universitetin rəhbər heyəti, professor-müəllimləri və tələbələri ilə yanaşı, Naxçıvan Müəllimlər İnstitutu, Bioresurslar İnstitutu, Təbii Ehtiyatlar İnstitutu və Astrofizika Rəsədxanasının əməkdaşları iştirak ediblər.

Elm və Ali Təhsil üzrə Dövlət Agentliyi nümayəndələri iştirakçıları elm və ali təhsilin beynəlmiləlləşməsi və beynəlxalq əməkdaşlıq imkanları, “Scopus”un süni intellekt alətindən istifadə etməklə tədqiqat bacarıqlarının inkişafı barədə məlumatlandırıb.

Dövlət Agentliyinin Beynəlxalq əməkdaşlıq şöbəsinin Xaricdə təhsil sektorunun müdiri Niftalı Qasımlı "Beynəlxalq əməkdaşlıq fəaliyyətinin təşkili" mövzusunda təqdimatla çıxış edib. Beynəlxalq reytinqlərdə iştirak, NDU-nun beynəlxalq əməkdaşlıq imkanları və istiqamətləri, vətəndaşlar üçün dövlət xətti ilə (HTP) xaricdə təhsil imkanları, xarici tələbələrin Azərbaycanda təhsil imkanları (“Heydər Əliyev adına Təhsil Qrantı”, HTP, İƏT, NAM və.s) və xarici tələbələrlə iş, Beynəlxalq mübadilə proqramları və digər mövzularda ətraflı məlumat verib.

Agentliyin Elmi müəssisələrlə iş şöbəsinin böyük məsləhətçisi Nərminə Abdullayeva "Scopus AI ilə tədqiqat bacarıqların inkişafı" mövzusunda təqdimatla çıxış edib.

Sonra tədbir iştirakçılarını maraqlandıran suallar səsləndirilib, görüş diskussiya şəklində davam edib.