Bu günlərdə Naxçıvan məktəblərində bir xəbər böyük əks-səda yaratdı… Bakı Atletika Mərkəzində 2008-2009-cu il təvəllüdlü idmançılar arasında keçirilən ölkə birinciliyində məktəblilərdən biri böyük nailiyyət əldə etdi. Bu uğurun sahibi Ordubad şəhər 3 nömrəli tam orta məktəbin IX sinif şagirdi Namiq Babayev idi. Yarışda iştirak edən altı atlet məktəblidən olan Namiq çətin mübarizədən sonra adını qaliblər siyahısına yazdırmağa müvəffəq oldu. Ümumilikdə o, 10 gün müddətində qatıldığı yarışlarda 3 qızıl və 1 gümüş medal qazanaraq həm valideynlərini, həm də müəllimlərini qürurlandırdı.

Elə qaçır ki…

Bu, Namiqin idmanda ilk uğuru deyil. O, 2023-cü ilin mayında qaçış üzrə idman növünə “ayaq açıb”. İndiki məşqçisi Əmrah Nağıyevin dəvəti ilə stadionda atdığı ilk addımları çox sürətli olub: “VII sinifdə oxuyurdum. Əmrah Nağıyev məni stadionda məşqə çağırdı. Başqa şagirdlər də cəlb etmişdi. Həmin gündən buradayam”.

O vaxtdan yaxşı qaçdığını həm özü müəyyənləşdirib, həm də müəllimləri, məşqçisi. Əmrah müəllim bu uğurlu yetirməsini 2008-2009-cu il təvəllüdlü idmançılar arasında Bakı Atletika Mərkəzində keçirilən ölkə birinciliklərinə çıxarıb: “İştirak etdiyim bütün yarışlarda qalib gəlmişəm. Cəmi bir dəfə ikincilik qazandım, o da öz səhvimə görə oldu. Bu da mənə çox pis təsir etdi”. 

Naxçıvan məktəblisi qaçmağa başladığı ilk gündən uğur qazanıb və bu səbəbdən əldə etdiyi ikincilik ona pis təsir edir: “Özümdən böyük yaş qrupunda da yarışıram. Yarış qaydalarına görə, həm yaşıdlarımla, həm də özümdən böyük qrupda yarışa bilərəm. Məsələn, ayrı-ayrı yaş qruplarında yarışlar fərqli günlərdə ardıcıl keçiriləndə ikisində də iştirak edirəm. Amma bəzən aralarında 1 ay vaxt olur, o zaman Bakıda qala bilmirəm, qayıdıram Naxçıvana”.

Qələbələri yarış həyəcanı sayəsində qazanır

Bir sözlə, Namiq yarışlara hər zaman ruh yüksəkliyi ilə qatılır: “Əgər yarış ruhu olmasa, qələbə qazana bilmərəm. Xüsusən özümdən böyüklərlə yarışanda yarış ruhum daha böyük olur, yaşıdlarımla qaçmaq o qədər də həyəcanlı deyil. İlk dəfə qatıldığım yarışda həddindən artıq həyəcanlı idim. Məncə, həyəcan sayəsində insan qələbə qazanır. Həyəcanlanmadığım yarışda arxayınlaşdım və birinciliyi əldən verdim”.

Namiq deyir ki, yarışlara hazırlıq heç də həmişə yüksək səviyyədə keçmir. Bəzən mənəvi dəstək də almaq lazım gəlir. Odur ki, arada onun da həvəsdən düşdüyü vaxtlar olub: “Ayağımı incitmişdim. Ona görə məşqlərə gəlmək istəmirdim. Həmin vaxt atam məni həvəsləndirdi, məşqlərdən geri qalmağıma imkan vermədi”.

Hər kəsin stimul qaynağıdır

Bu müvəffəqiyyəti ilə o nəinki məktəbində, kənddə, rayonda nümunədir, həm də ailəsində qardaşları üçün stimul mənbəyidir: “Mən qaçışa başlayandan sonra ortancıl qardaşım da idmanla maraqlanmağa başladı. O, indi karate ilə məşğul olur”.

Namiq dərslərini də yaxşı oxuyur. Coğrafiyanı, ədəbiyyatı da sevdiyini deyir: “İkinci ixtisas qrupu üzrə hazırlaşıram. Azərbaycan İdman Akademiyasında ali təhsil almaq istəyirəm. Əsas hədəfim qaçış üzrə peşəkar səviyyədə məşğul olmaq, beynəlxalq yarışlara qatılmaq və ölkəmə qızıl medallar gətirməkdir”.