“Məzunların məşğulluq reytinqi platforması” bizə ali təhsil müəssisələrini bitirən məzunların əmək bazarına inteqrasiyası, məşğulluq dövrləri və trendlərini real vaxtda izləmək imkanı yaradır”. 

“Azərbaycan müəllimi” xəbər verir ki, bunu Azərbaycan Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Məşğulluq Agentliyinin İdarə Heyətinin sədri Sadiq Əliyev “Müasir dünyanın çağırışları kontekstində sosial müdafiə sistemlərinin uyğunlaşdırılması” mövzusunda keçirilən beynəlxalq konfransda deyib.

Onun sözlərinə görə, bu rəqəmsal sistem vasitəsilə məzunların hansı ixtisaslar üzrə, hansı iqtisadi fəaliyyət sahələrində daha çox təmsil olunduqları müəyyən edilir. Bu da əmək bazarının tələbləri ilə təhsil sisteminin təklif etdiyi ixtisaslar arasında uyğunluğu təhlil etməyə və bu istiqamətdə əsaslandırılmış qərarlar qəbul etməyə imkan verir.

Sadiq Əliyev əlavə edib ki, platforma həmçinin muzdla çalışan şəxslərin hansı sektorlarda daha aktiv fəaliyyət göstərdiyini izləməyə, məşğulluq dinamikasını təhlil etməyə və əmək bazarında formalaşan sektorial trendləri müşahidə etməyə şərait yaradır:

“Bu baza bizə imkan verir ki, universitetlər və ixtisaslar üzrə nəticələri müqayisə edək, hansı ali təhsil müəssisəsinin məzunlarının əmək bazarına daha uğurla inteqrasiya olunduğunu müəyyənləşdirək. Nəticədə əmək bazarında hansı ixtisaslara daha çox tələbat olduğunu və bu tələbatın strukturunu dəqiq şəkildə müəyyənləşdirmək mümkün olur. Bu da təhsil proqramlarının optimallaşdırılması və ixtisas seçiminin daha düzgün istiqamətləndirilməsi baxımından böyük əhəmiyyət daşıyır”.

Agentlik sədri sonda qeyd edib ki, artıq peşə təhsili üzrə məzunların məşğulluq göstəricilərinin izlənməsi istiqamətində işlərə başlanılıb. Gələcəkdə bu sahəyə dair məlumatların da reytinq platformasına inteqrasiyası planlaşdırılır:

“Bu, bizə yalnız ali təhsil üzrə deyil, ümumilikdə milli səviyyədə kadr hazırlığı və məşğulluq siyasətini daha hədəfli şəkildə qurmağa imkan verəcək. Sözügedən platforma təhsil və məşğulluq sahələri arasında körpü rolunu oynayır və həm qərarverici qurumlara, həm də ictimaiyyətə mühüm analitik imkanlar təqdim edir”.