Ötən həftə “Qarabağ” futbol klubunun prezidenti, iş adamı Tahir Gözəl Sənaye və İnnovasiyalar üzrə Bakı Dövlət Peşə Təhsil Mərkəzi ilə tanış olub.

“Azərbaycan müəllimi” xəbər verir ki, müəssisədə keçirilən görüş zamanı Peşə Təhsili üzrə Dövlət Agentliyinin direktoru Ceyhun Kərəmov qonağa peşə təhsili sistemində aparılan islahatlar və sənayenin ehtiyaclarına uyğun kadr hazırlığı barədə məlumat verib.

Sənaye və İnnovasiyalar üzrə Bakı Dövlət Peşə Təhsil Mərkəzi beynəlxalq təhsil standartlarına əsaslanan peşə təhsili müəssisəsidir. Yeni Peşə Təhsil Mərkəzi ən müasir maddi-texniki baza ilə təchiz olunub və 8 istiqamət - İKT, avtomobil, mexanika, sənayedə quraşdırma işləri, elektronika, elektrik mühəndisliyi, avtomatlaşdırma və inşaat - üzrə 1000-dək kadrın hazırlanması məqsədilə 2019-2020-ci tədris ilində fəaliyyətə başlayıb.

Onu da qeyd edək ki, bu təhsil müəssisəsinə qəbul 2022-2023-cü tədris ilində 519 nəfər olmuşdusa, 2024-2025-ci tədris ilində 893 nəfər olub.

Görüş əsnasında iş adamı Tahir Gözəl ölkədə peşə təhsilinin inkişafında özəl sektorun əhəmiyyətli rolunu vurğulayıb, peşəkar kadr potensialının artırılması istiqamətində dövlət-özəl tərəfdaşlığının vacibliyini qeyd edib.

Azərbaycanın aparıcı şirkətlərindən biri olan “AzerSun Holding” ilə əməkdaşlıq imkanlarının müzakirəsi zamanı holdinqin peşə təhsili sahəsində təhsilverənlərin inkişafına və onların bilik və bacarıqlarının əmək bazarının tələblərinə uyğun artırılmasına dəstək verməsi məsələləri diqqət mərkəzində olub. Görüşdə tələbələrin istehsalat təcrübəsinə cəlb edilməsi, pedaqoji heyətin istehsalat prosesində ixtisasartırma təlimlərində iştirakı və s. istiqamətdə əməkdaşlıq imkanları da müzakirə edilib. Həmçinin holdinq əməkdaşları üçün qısamüddətli təlimlərin təşkili imkanları nəzərdən keçirilib.