Martın 14-də “Sabahın alimləri” XIV Respublika Layihə Müsabiqəsinin qaliblərinin mükafatlandırılma tədbiri keçirilib.

“Azərbaycan müəllimi” xəbər verir ki, tədbir Dövlət Himninin səsləndirilməsi ilə başlayıb. Daha sonra müsabiqə ilə bağlı hazırlanmış videoçarx nümayiş olunub.

Tədbirdə iştirak edən elm və təhsil nazirinin müavini Firudin Qurbanov şagirdləri nailiyyətlərinə görə təbrik edib. O bildirib ki, bu müsabiqənin qalibi olan şagirdlər yalnız ölkəmizi beynəlxalq səviyyədə təmsil etmək imkanı əldə etmirlər. Onlar həm də Azərbaycan elminə töhfə verməklə yaxın gələcəyin, sabahın alimləri olmağa bir addım daha da yaxınlaşırlar. 

Nazir müavini qeyd edib ki, hələ 1983-cü ildə ABŞ-də təhsilin keyfiyyətinin yaxşılaşdırılması üzrə milli komissiyanın hesabatında XXI əsr üçün tələb olunan əsas bacarıqlar öz əksini tapmışdı. Bunlar öyrənmə və tədqiqat aparma, anlama, biliklərin təcrübədə istifadəsi, tənqidi təfəkkür, ünsiyyət və texnoloji biliklərə yiyələnməkdir.

Nazir müavini əlavə edib ki, hazırda yaradıcı şəxslərin fəaliyyəti müasir sosial inkişafın əsas mənbəyidir: “Əgər biz dünyada özünəməxsus yer tutmaq istəyiriksə, XXI əsr ölkəmiz üçün yaradıcılıq əsrinə çevrilməlidir, çünki bu gün dinamizm, sosial və elmi-texniki inkişafın uğuru yalnız yaradıcı şəxslərin fəaliyyətinin səmərəliliyindən asılıdır”.

Daha sonra Elm və Təhsil Nazirliyinin İnformasiya Texnologiyaları İnstitutunun baş direktoru Rasim Əliquliyev çıxış edərək son illər ölkəmizdə gənclərin hərtərəfli biliklərə yiyələnməsi, onların elmi potensialının üzə çıxarılması istiqamətində həyata keçirilmiş layihələrdən danışıb.

Tədbirdə 1, 2 və 3-cü yerlərin qaliblərinə diplom və medallar, fərqlənən şagirdlərə xüsusi mükafatlar təqdim olunub. İştirakçıların hər birinə sertifikatlar, qalib layihələrin elmi rəhbərlərinə isə təşəkkürnamələr verilib.

Qeyd edək ki, müsabiqə Elm və Təhsil Nazirliyi, Təhsil İnstitutu, Heydər Əliyev Mərkəzi, Azərbaycan Təhsil İşçiləri Azad Həmkarlar İttifaqı Respublika Komitəsi və Azərbaycan Milli Elmlər Akademiyasının təşkilatçılığı ilə keçirilib.