Məktəblərdə valideyn komitələrinin fəaliyyətinin düzgün formada təşkili valideynlərin təhsil prosesində iştirakının artmasına imkan verməklə yanaşı, təhsil mühitinin də səmərəli formalaşmasına yardım edə bilər. Müxtəlif meyarlar nəzərə alınmaqla təşkil olunan komitələrin fəaliyyəti nəticəsində təkcə məktəb-müəllim əməkdaşlığının artmasına səbəb olmaz. Bu, dolayı yolla şagirdlərin təhsil göstəricilərinin nisbətən yüksəlməsinə, tədrisin daha münbit şəraitdə təşkilinə və keyfiyyətinin artmasına gətirib çıxara bilər.  

Təhsil eksperti Əminət Diganayeva bildirib ki, valideyn komitələri dedikdə bir çoxlarının ağlına yalnız pul yığımı və ya hər hansı bir müəllimə, valideynə qarşı təzyiq məsələləri yada düşür: 

“Əslində, düzgün təşkil olunmuş valideyn komitələri təhsilin irəliləməsinə yaxşı təsir göstərir. “Düzgün təşkil olunma” deyəndə bunu nəzərdə tuturam ki, valideyn komitələri üzvlərinin iştirakı ilə özlərinin illik fəaliyyət planını müəyyənləşdirərək iş planı qurur, ildə bir neçə dəfə iclas keçirərək valideynləri təhsildə, məktəbdə baş verən hadisələrdən xəbərdar edirlər. Bununla da məktəbin işinin yaxşı təşkilinə dəstək göstərirlər. Yəni valideyn komitəsinin işinin məqsədi əslində, məktəbə, müəllimə dəstək göstərmək olmalıdır”.

Onun sözlərinə görə, valideyn komitələrinin yaxşı təşkil olunması, məktəb-valideyn münasibətlərinin səmərəli qurulması uşaqların nəticələrində də yaxşı təsir göstərir: 

“Valideynlərin təhsillə bağlı olan bütün məsələlərdən - istər kurikulum, istərsə  qiymətləndirmə, istərsə də dərsliklərdəki yeniliklərdən xəbəri olmalıdır. Bu yeniliklərdən xəbəri olan valideyn bununla uşağına dəstək verə bilir. Son illərdə bullinq mövzuları da gündəmə gəlib. Bu mövzularda valideynlərin maariflənməsi yaxşı nəticə verir. Müəllimlə valideynin qarşılıqlı əməkdaşlığı nəticəsində bu kimi problemlər öz həllini tapa bilər. Şagirdlərə verilən ev tapşırıqlarının edilib-edilməməsi, davranışla bağlı problemlərinin həllində bu komitələrin rolu böyükdür. İclaslara gələn valideynlər düşünürlər ki, burada məktəb rəhbərliyi, müəllimlər sadəcə onların uşaqlarının davranışını, göstəricilərini qiymətləndirəcəklər. Lakin belə iclasların məqsədi hansısa bir şagirddən şikayət etmək deyil, mövcud problemləri aşkarlayaraq ortaq həll yolu tapmaqdır. Hər hansı bir uşağın davranışında problem varsa, dərsdə geriləyirsə, məktəb və valideyn bunu əməkdaşlıq şəklində müzakirə edə bilər”.

Əminət Diganayeva qeyd edib ki, bəzi hallarda məktəb özünün müəyyən ehtiyaclarını qarşılaya bilmir. Belə hallarda valideyn komitələrinin dəstəyi ilə müəyyən fondlara  müraciət edilmə də mümkündür: 

“Təbii ki, valideynlər müəllimlərlə birlikdə buna təşəbbüs göstərə bilərlər. Bu kimi hallar valideynlərin məktəbin fəaliyyətində iştirakını artırır. Hətta valideynlər vaxt tapdıqca növbə ilə məktəbə gələ, tədris prosesində müəllimlərə ara-sıra kömək edə, yaradıcı ideyalar irəli sürə bilərlər. Sonda  bu, uşaqların həm yaradıcı, həm də akademik nəticələrinə müsbət təsir edər. Bu ideyalardan biri hər dəfə bir valideynin öz peşəsi haqqında şagirdlərə danışması ola bilər”.