“Yüksəliş” bacarıqlı kadrların inkişafına geniş imkanlar yaradır – Ombudsman
“Müasir dünyada əmək bazarının tələblərinə uyğun rəqabətqabiliyyətli insan kapitalının formalaşdırılması dövlət siyasətinin prioritet istiqamətlərindəndir”.
“Azərbaycan müəllimi” xəbər verir ki, bu barədə Azərbaycan Respublikasının İnsan Hüquqları üzrə Müvəkkili Səbinə Əliyeva beşinci “Yüksəliş” müsabiqəsinin yarımfinal mərhələsində çıxışı zamanı bildirib.
Onun sözlərinə görə, “Yüksəliş” müsabiqəsi ölkədə strateji idarəçilik mədəniyyətinin formalaşmasına, intellektual kapitalın önə çəkilməsinə və bacarıqlı kadrların inkişafına geniş imkanlar yaradır: “Bu təşəbbüs yalnız idarəçilik müsabiqəsi deyil, həm də Azərbaycanın gələcəyinə xidmət edən liderlik məktəbidir”.
Ombudsman qeyd edib ki, ölkəmizdə qanunun aliliyinə və ədalətə söykənən qanunvericilik bazası təkmilləşdirilir. Prezidentin sərəncamı ilə cari ilin “Konstitusiya və Suverenlik İli” elan edilməsi də bu məqsədlərə xidmət edir.
Səbinə Əliyeva bildirib ki, Azərbaycanın 2030-cu ilədək milli prioritetlərindən biri rəqabətqabiliyyətli insan kapitalının formalaşdırılmasıdır:
“BMT-nin Dayanıqlı İnkişaf Məqsədləri ilə uzlaşan bu məqsəd müasir biliklərin və rəqəmsal bacarıqların artırılmasını tələb edir”.
Ombudsman həmçinin “Yüksəliş” müsabiqəsi qaliblərinin idarəetmə bacarıqlarının inkişafı və həssas qrupların hüquqlarının müdafiəsi sahəsində praktiki təşəbbüslərdə iştirakı üçün şərait yaradıldığını qeyd edib.
