Şagirdlərimə Vətəni necə sevməyi öyrədirəm - Mayor Bayram Hüseynov

Vətən sevgisi, sədaqət, igidlik və müəllim fədakarlığı — bu dörd anlayışın hamısını bir insanın həyatında cəmləmək mümkündürmü? Əlbəttə, mümkündür. Bu, Azərbaycan Ordusunun igid zabiti, bu gün isə cəbhədən təhsil səngərinə keçmiş qürurlu bir müəllim – mayor Bayram Nizami oğlu Hüseynovun həyat yoludur.

“Azərbaycan müəllimi” olaraq bu dəfə mayor Bayram Hüseynovun həyatından bəhs edəcəyik. Yevlax şəhər 5 nömrəli tam orta məktəbin “Gənclərin çağırışaqədərki hazırlığı” fənn müəllimi olan Bayram Hüseynovla söhbətimiz bizi həm döyüş meydanına, həm də sinif otağına aparır.

“Vətən uğrunda can qoymaq mənim üçün seçim deyildi – borc idi!”
Bayram müəllim 2001-ci ildən Azərbaycan Ordusunun sıralarında xidmət edib. O, hərbi həyatını bir vətənpərvər kimi sədaqətlə yaşayıb, hər bir addımında torpaq sevgisini rəhbər tutub.  2020-ci il sentyabrın 27-də başlayan Vətən müharibəsi onun üçün həyatının ən sınaqlı dönəmi olub. 

“Füzuli, Cəbrayıl, Qubadlı və Laçın istiqamətində gedən döyüşlərdə iştirak etmişəm. Döyüş yoldaşlarım arasında yaralı olanlar, şəhid olanlar vardı. Mən də yaralandım, amma geri çəkilmədim. Komandir kimi vəzifəm, ən əsası isə borcum idi ki, əsgərlərimi başsız qoymayım. Hər biri mənim üçün ailə üzvü idi”. 
Bu sözləri deyərkən onun səsi bir az titrəyir, amma baxışları qürurludur. Hər bir ifadəsində “Mən Vətənə borcumu verdim” mesajı duyulur.

Döyüş meydanından sinif otağına – yeni “cəbhə”

Müharibədən sonra Bayram müəllim silahını bir kənara qoydu, amma mübarizəsini dayandırmadı. O, bu gün Vətən uğrunda döyüşən yeni nəsil – gənclər üçün “mənəvi cəbhə”də xidmət edir.
Hazırda o, Yevlax şəhər 5 nömrəli tam orta məktəbdə “Gənclərin çağırışaqədərki hazırlığı” fənnini tədris edir. Onun dərslərində sadəcə nizam-intizam yox, həm də Vətən sevgisi, fədakarlıq və cəsarət ruhu var.
“Mən şagirdlərə təkcə silahı necə tutmağı yox, həm də Vətəni necə sevməyi öyrədirəm. Çünki güllə atmaqdan öncə, ürəkdə sevgi olmalıdır – o sevgi səni qorxusuz döyüşə aparar”.

Uğurlu komandir, uğurlu müəllim

Bayram müəllimin rəhbərliyi altında şagirdlər bir çox yarışlarda fərqləniblər:
“Şahin” hərbi-idman oyunlarında — rayon üzrə I, bölgə üzrə III yer,
“Gənc xilasedici və yanğınsöndürən” yarışında — rayon və bölgə üzrə I yer,
“Zəfər – 5 illik” yarışında — II yer qazanıblar.
Bu nailiyyətlər təkcə hazırlığın deyil, həm də ruhun gücündən xəbər verir. Bayram müəllim şagirdlərində o ruhu formalaşdırmaqla qürur duyur.

Qəhrəmanlıq və ehtiram – məktəbin həyat tərzi

Onun təşəbbüsü ilə məktəbdə mütəmadi olaraq şəhid ailələrinin ziyarəti, onların xatirəsinə anım tədbirləri, vətənpərvərlik dərsləri keçirilir. 2024-cü ildə məktəbin şəhid məzunlarının xalça üzərində təsvir olunmuş portretlərinin ailələrinə təqdim olunması isə bütün Yevlax ictimaiyyətində dərin təəssürat doğurub.
“Bu xalçalar bizim üçün sadəcə sənət əsəri deyildi, onlar xatirə idi, Vətən üçün canını verən övladlarımızın ruhuna ehtiram idi”.

Qəhrəmanın təltifləri – sədaqətin nişanəsi

Mayor Bayram Hüseynov göstərdiyi igidliyə və xidmətlərinə görə bir çox orden və medallarla təltif olunub. “Füzulinin, Cəbrayılın, Qubadlının, Laçının azad olunmasına görə” medalları ilə yanaşı, “Qüsursuz xidmətə görə” II və III dərəcəli medallar, həmçinin “Vətən müharibəsi iştirakçısı” medalı ilə təltif olunub. “Silahlı Qüvvələrin yaranmasının 90, 95 və 97 illiyi” yubiley medalları da Bayram müəllimin vətənə sədaqətinin simvolu, onun həm hərbi, həm də mənəvi döyüşlərinin rəmzidir.

Səngərdən sinifə uzanan şərəfli yolun simvolu

Bayram müəllimin həyatı bir mesaj verir: qəhrəmanlıq təkcə döyüş meydanında deyil, hər gün, hər dərsdə, hər gəncin qəlbində yenidən yaşanır. O, ordu meydanından təhsil səngərinə keçib, amma hədəf eynidir – Vətənə xidmət etmək.

Mayor Bayram Hüseynov bu gün həm zabit, həm döyüşçü, həm də müəllim kimi bir amalın daşıyıcısıdır: “Vətən üçün yaşamaq, Vətən üçün yetişdirmək”.