MİQ-də iştirak edəcək müəllimlərə CAVAB VERİLDİ
Elm və Təhsil Nazirliyindən müəllimlərin işə qəbulu (MİQ) müsabiqəsinə qatılan namizədlərə cavab gəlib.
"Azərbaycan müəllimi" Modern.az-a istinadən xəbər verir ki, MİQ-ə ərizə verən namizədlərin təhsil sənədləri, şəxsi məlumatları və digər zəruri sənədlərinin emalı yekunlaşıb.
Nazirlikdən namizədlərin şəxsi kabinetinə göndərilən cavabda kimlərin MİQ-ə buraxıldığı, kimlərin buraxılmadığı açıqlanıb.
Qeyd edilib ki, elektron ərizəsi yoxlanıldıqdan sonra MİQ-də iştirakı təsdiqlənən namizədlərə müsabiqənin növbəti mərhələsi barədə yaxın günlərdə yeni məlumat veriləcək,
Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov Modern.az-a bildirib ki, bu həftə ərzində MİQ imtahanlarının tarixi ictimaiyyətə açıqlanacaq.
Agentlik rəhbərinin sözlərinə görə, cari ildə imtahan üçün 40 mindən çox namizəd qeydə alınıb.
Xatırladaq ki, MİQ-ə elektron sənəd qəbulu mərhələsi 3 iyunda başlayıb, 10 iyunda yekunlaşıb.
Nazirlər Kabinetinin qərarına əsasən, MİQ müsabiqəsi bu ildən ödənişli əsaslarla həyata keçirilir və iştirak rüsumu 60 manat müəyyən edilib.
